Ajit Pawar Passes Away : महाराष्ट्राचे उपमुख्यमंत्री अजित पवार यांचे विमान अपघातादरम्यान निधन झाले आहे. अजित पवार हे मुंबईहून बारामती विमानाने प्रवास करत होते. विमान लँडिंग आधी बरामती विमानतळाजवळील एक शेतात कोसळले. यादरम्यान अजित पवार यांचे भीषण अपघातात निधन झाले. तसेच त्यांच्या निधनाने संपूर्ण महाराष्ट्र हादरला आहे. इतकंच नव्हे तर संपूर्ण मराठी मनोरंजनसृष्टीतून अजित पवारांच्या निधनानंतर शोक व्यक्त केला जात आहे. नुकतीच ‘बिग बॉस’ फेम सूरज चव्हाणने सोशल मीडियावर पोस्ट शेअर करत अजित पवारांना श्रद्धांजली वाहिली आहे.
सूरज चव्हाणने त्याच्या इन्स्टाग्राम अकाऊंटवर पोस्ट शेअर केली आहे. या पोस्टमध्ये तो अजितदादांना नमस्कार करताना दिसत आहे. पुढे त्याने अजित दादांचे काही फोटो देखील शेअर केले आहेत. हे फोटो शेअर करत सूरजने लिहिलं की, “मित्रांनो माझा देव चोरला आज. मित्रांनो मला अजिबात विश्वास होत नाही की आपले लाडके कार्यसम्राट अजित दादा आपल्यात नाही. माझ्यासारख्या गरीब मुलाला त्यांनी इतकं सोन्यासारखं घर बांधून दिलं. माझी काळजी घेतली. मला नवीन आयुष्य मिळवून दिलं. अजित दादांसारखा देव माणूस या जगात नाही. याचं मला खूप वाईट वाटत आहे. खूप दुःख होत आहे. माझ्या आई-वडिलांतर अजित दादाने माझ्यासाठी इतकं केलं. मी आयुष्यभर त्यांची आठवण माझ्या काळजात सांभाळून ठेवेन.” (Ajit Pawar Passes Away)
दरम्यान अजित पवार हे मुंबईहून पुण्याच्या दिशेने, म्हणजेच बारामतीकडे येत असताना हा अपघात घडल्याचं सांगितलं जात आहे. अजित पवार हे बारामती येथे सभेसाठी आले होते. मात्र, लँडिंग करताना विमानाला अपघात झाल्याने संपूर्ण राज्यात खळबळ उडाली आहे. मिळालेल्या माहितीनुसार, हा अपघात सकाळी सुमारे ९ ते ९.१५ वाजण्याच्या दरम्यान झाला. हा अपघात इतका भीषण होता की विमानाला तात्काळ आग लागली होती. (Ajit Pawar Passes Away)
