ज्येष्ठ अभिनेते मिथुन चक्रवर्ती यांच्या छातीत दुखू लागल्याने शनिवारी कोलकाता येथील खासगी रुग्णालयात त्यांना दाखल करण्यात आलं. मिथुन यांच्या तब्येतीबाबतची एक मोठी अपडेट समोर आली आहे. मिथुन यांच्यावरील उपचार पूर्ण झाले असून त्यांना रुग्णालयातून डिस्चार्ज देण्यात आला आहे. ‘पीटीआय’ या वृत्तसंस्थेच्या ताज्या अपडेटनुसार मिथुन यांना काल सोमवारी दुपारी डिस्चार्ज देण्यात आला. आता ते पूर्णतः ठीक आहेत आणि त्यांच्या आगामी चित्रपटांचे शूटिंग पुन्हा सुरू करणार आहेत, ही बातमी समोर आली आहे. (Mithun Chakraborty discharged)
मिथुन यांची तब्येत पूर्णतः ठीक असल्याचं समोर येताच अभिनेत्याला आता डिस्चार्ज देण्यात आल्याचे समोर आले आहे. ७३ वर्षीय मिथुन यांच्या १० फेब्रुवारी रोजी छातीत तीव्र वेदना होत असल्याच्या तक्रारीनंतर त्यांना खासगी रुग्णालयात दाखल करण्यात आले. याबाबत बोलताना अभिनेत्याने असेही म्हटले होते की, “खरं तर कोणतीही समस्या नाही, मी पूर्णपणे ठीक आहे. मला माझ्या खाण्याच्या सवयींवर नियंत्रण ठेवावे लागेल. बघूया. मी लवकरच कामाला लागेन, कदाचित उद्यापासूनच मी कामाला सुरुवात करेन”, असं ते म्हणाले.
मिथुन यांनी खुलासा करत असेही सांगितले की, रविवारी त्यांना पंतप्रधान नरेंद्र मोदी यांचा फोन आला होता आणि तब्येतीची काळजी न घेतल्याबद्दल त्यांना फटकारले असल्याचंही सांगितलं. यापूर्वी, हॉस्पिटलने अधिकृत निवेदनात असे नमूद केले होते की, मिथुन यांना मेंदूचा इस्केमिक सेरेब्रोव्हस्कुलर अपघात (स्ट्रोक) झाला आहे. अनेक ज्येष्ठ डॉक्टर व थेरपिस्ट यांनी ज्येष्ठ अभिनेत्याच्या प्रकृतीचा आढावा घेतला. सध्या ते पूर्णपणे ठीक झाले असून सुस्थितीत आहेत. डिस्चार्ज होण्यापूर्वी त्याच्या काही तपासण्या केल्या गेल्याचंही यावेळी सांगितलं.
रविवारी हॉस्पिटलमधून त्यांचा पहिला व्हिडीओदेखील समोर आला होता. या व्हिडीओमध्ये मिथुन चक्रवर्ती डॉक्टरांशी बोलताना दिसले. पश्चिम बंगाल भाजपचे प्रमुख सुकांत मजुमदार व माजी क्रिकेटपटू सौरव गांगुली त्यांना भेटायला आले होते. समोर आलेल्या व्हिडीओमध्ये मिथुन हॉस्पिटलच्या बेडवर बसलेले पाहायला मिळाले.