Bollywood News : बॉलिवूड अभिनेता आणि उद्योजक विवेक ओबेरॉय यांनी त्यांच्या नावाचा, फोटोचा आणि ओळखीचा गैरवापर होत असल्याचा गंभीर मुद्दा उपस्थित करत दिल्ली हायकोर्टात महत्त्वाची याचिका दाखल केली आहे. सोशल मीडियावर सुरू असलेल्या फेक अकाउंट्स, डीपफेक व्हिडीओ आणि बेकायदेशीर व्यावसायिक वापराविरोधात त्यांनी न्यायालयाकडे दाद मागितली आहे. त्यांचा दावा आहे की अनेक अज्ञात लोक सोशल मीडियावर त्यांच्या नावाने बनावट अकाउंट्स चालवत असून त्यांच्या फोटो, आवाज आणि ओळखीचा गैरवापर करत आहेत.
फेक अकाउंट्सपासून बेकायदेशीर विक्रीपर्यंतचा प्रकार विवेक ओबेरॉय यांनी कोर्टात सांगितलं की काही लोक त्यांच्या ओळखीचा वापर करून परवानगीशिवाय वस्तू विकत आहेत. तर काही ठिकाणी आर्टिफिशियल इंटेलिजन्स आणि डीपफेक तंत्रज्ञानाचा वापर करून त्यांच्या प्रतिमा चुकीच्या आणि आक्षेपार्ह पद्धतीने सादर केल्या जात आहेत, ज्यामुळे त्यांच्या प्रतिमेला मोठा धक्का बसत आहे. व्हिडीओ आणि विविध पोस्ट्सद्वारे त्यांची बदनामी केली जात असल्याचंही विवेक यांनी याचिकेत नमूद केलं आहे. या प्रकारचं कंटेंट केवळ दिशाभूल करणारंच नाही, तर अपमानजनक आणि मानहानीकारक असल्याचं त्यांनी स्पष्ट केलं आहे. काही जण त्यांच्या लोकप्रियतेचा गैरफायदा घेत व्यावसायिक लाभ मिळवण्याचा प्रयत्न करत असल्याचाही आरोप आहे.
आणखी वाचा – अनुश्रीचा रुचितावर संताप, ‘बिग बॉस’च्या घरामध्ये पेटला वाद, विशालच्या टोळीमध्ये फूट पडणार अन्…
नाव आणि ओळखीवर पहिला हक्क स्वतःचाच असतो असं याचिकेत स्पष्ट करण्यात आलं आहे. कोणत्याही कलाकार किंवा सार्वजनिक व्यक्तीच्या नावावर, प्रतिमेवर आणि ओळखीवर सर्वात पहिला अधिकार त्या व्यक्तीचाच असतो. त्याच्या संमतीशिवाय त्याचा कोणताही व्यावसायिक वापर करणं कायद्याने चुकीचं असून त्यामुळे त्या व्यक्तीची प्रतिष्ठा धोक्यात येते. महत्त्वाचं म्हणजे याआधीही दिल्ली हायकोर्टने पवन कल्याण, माजी क्रिकेटपटू सुनील गावस्कर, अभिनेता आर. माधवन, एनटीआर ज्युनियर आणि सलमान खान यांसारख्या अनेक प्रसिद्ध व्यक्तींच्या पर्सनॅलिटी राइट्सचे संरक्षण केले आहे.
