मनोरंजन विश्वात गेले काही दिवस लग्नसराई सुरु आहे. एकामागोमाग एक कलाकार मंडळी आपल्या जोडीदाराबरोबर विवाहबंधनात अडकत आहेत. अशातच बॉलिवूड मधील एक अभिनेत्री आता विवाहबंधनात अडकली आहे. प्रियांका चोप्रा आणि परिणिती चोप्रा यांची चुलत बहीण आणि अभिनेत्री मीरा चोप्रा नुकतीच विवाहबंधनात अडकली आहे. मंगळवार १२ मार्च रोजी जयपूरमध्ये व्यावसायिक रक्षित केजरीवालबरोबर मीराने लग्नगाठ बांधली. हा लग्न सोहळा पार पडताच तिने तिच्या इन्स्टाग्राम अकाउंटद्वारे लग्नाचे काही खास फोटो शेअर केले. यावेळी मीराने आपल्या लग्नात लाल रंगाचा भरजरी लेहेंगा परिधान केला होता आणि रक्षितने लग्नात पांढरी शेरवानी परिधान केली होती.
मीराने हे फोटो शेअर करताना असे कॅप्शन दिले की, “आता नेहमी आनंद, भांडणं, हासू, आसू आणि आयुष्यभराच्या आठवणी, आता प्रत्येक जन्म तुझ्याबरोबरच…” मीराने अशी पोस्ट केल्यानंतर तिच्यावर शुभेच्छांचा वर्षाव होतो आहे. केजरीवाल आणि चोप्रा कुटुंबीयांच्या लग्नाआधीच्या सोहळ्याचेही फोटो सोशल मीडियाद्वारे समोर आले आहेत.
मीरा आणि रक्षित यांच्या लग्नाआधीच्या विधींना सोमवार (११ मार्च) रोजी मेहंदी व संगीत समारंभांनी सुरुवात झाली होती. गौरव चोप्रा, अर्जन बाजवा, मधुर भांडारकर आणि आनंद पंडित यांच्यासह अनेक सेलिब्रिटींनी संगीत रात्री हजेरी लावली. यावेळी प्रियांका चोप्राची आई मधु चोप्रा देखील उपस्थित होती.
मीराच्या लग्नात प्रियांका व परिणीती चोप्रा या दोघी बहिणी दिसल्या नाहीत, शिवाय मन्नारा चोप्रादेखील गैरहजर होती. त्यामुळे मिळालेल्या माहितीनुसार मीराच्या कुटुंबीयांशी त्यांचे एवढे चांगले संबंध नसल्याचे म्हटले जात आहे. याच कारणामुळे ते एकमेकांच्या कार्यक्रमात सहभागी झालेले नाहीत.
दरम्यान, मीरा ही तमिळ, तेलुगु तसेच हिंदी भाषांमधील अनेक चित्रपटात काम केले आहे. अनबे आरुयरे, बंगाराम, गँग्स ऑफ घोस्ट, सेक्शन ३७५, वाना, अर्जुन, १९२० लंडन आणि सफेद यांसारख्या अनेक चित्रपटांमध्ये काम करत तिने प्रेक्षकांचे मनोरंजन केले आहे. त्याचबरोबर ‘द टॅटू मर्डर्स अँड हिकअप्स अँड हुकअप्स’ या वेब सीरिजमध्येही ती दिसली आहे.