कलाकार आपल्या खासगी आयुष्याबाबत बऱ्याचदा बोलणं टाळतात. पण शिवानी सुर्वे याला अपवाद आहे. शिवानी गेल्या काही वर्षांपासून ‘सातव्या मुलीची सातवी मुलगी’मधील अद्वैत म्हणजे अजिंक्य ननावरेला डेट करत आहे. ‘बिग बॉस मराठी’मध्ये आल्यानंतर शिवानीने याबाबत भाष्य केलं होतं. आता दोघंही लवकरच विवाहबंधनात अडकणार आहेत. याचबाबत नुकत्याच दिलेल्या एका मुलाखतीत शिवानीने भाष्य केलं आहे. तसेच ती तिच्या नात्याबाबत खुलेपणाने बोलली आहे. गेल्या काही वर्षांपासून अजिंक्य व शिवानी एकमेकांना डेट करत आहेत. याचबाबत ‘दिले के करीब’ या कार्यक्रमात शिवानीने भाष्य केलं.
अजिंक्यबरोबरच्या नात्याबाबत शिवानीला विचारताच ती म्हणाली, “अजिंक्य व मी २०१५मध्ये एकत्र मालिका करत होतो. स्टार प्रवाह वाहिनीवर ‘तू जीवाला गुंतवावे’ ही ती मालिका होती. मालिका सुरु झाल्यानंतर काही दिवसांनंतर त्याची कथानकमध्ये एन्ट्री झाली. पण त्याच्या एन्ट्रीनंतर तीन महिन्यांनी मालिकाच बंद झाली. तेव्हा फक्त मैत्री होती. पण मालिका बंद झाल्यानंतर असं वाटलं की, काहीतरी वेगळं आहे. काम करत असताना इतरांमध्ये आपण जास्त लुडबूड करत नाही. पण अजिंक्यच्या गोष्टींमध्ये मला लुडबूड करावीशी वाटली. तेव्हापासून आतापर्यंत मी त्याच्या प्रत्येक गोष्टींमध्ये लक्ष देतच आहे”.
“तो खूपच चांगला आणि शांत आहे. माझ्या जवळच्या लोकांशी जेवढं मी बोलते किंवा व्यक्त होते त्याच्या अगदी विरुद्ध अजिंक्य आहे. माझ्यापेक्षा जरा जास्तच शांत व समजुतदार आहे. मालिका संपल्यानंतर भेटणं, दिवसभर एकत्र राहणं सुरु झालं. त्यानंतर दोघांमध्ये काहीतरी नातं आहे याची जाणीव झाली. आम्ही एकमेकांना अजूनही प्रपोज केलं नाही. फक्त गोष्टी घडत गेल्या आणि आज आम्ही एकत्र आहोत. २०१५-१६मध्ये आम्ही रिलेशनशिपची सुरुवात केली. २०१७मध्येच आम्ही आमच्या घरी नात्याबाबत सांगितलं होतं. मी माझ्या आईला आणि त्याने त्याच्या आई व आजीला सांगितलं होतं. दोन्ही घरामधून आमच्या नात्याला प्रचंड विरोध होता. त्यांचं असं म्हणणं होतं की, हे फक्त एकमेकांबाबतचं आकर्षण आहे. जर तुम्हाला वाटत असेल की, आम्ही तुमच्यावर विश्वास ठेवावा तर तुम्ही एकत्र राहून दाखवा. अजूनपर्यंत आम्ही त्यांना एकत्र राहून दाखवत आहोत”.
“लॉकडाऊनमध्येच त्यांना विश्वास बसला की, आम्ही एकत्र राहू शकतो. आम्ही दोघं आयुष्यभर एकत्र राहू हे त्यांना लॉकडाऊननंतर पटलं. अजिंक्यचे बाबा म्हणाले की, लॉकडाऊन तुम्ही न भांडता काढू शकता तर तुम्ही एकत्र राहू शकता. खरं तर चार वर्षांनंतर कुटुंबियांकडून आम्हाला होकार मिळाला. खूप लवकर आम्ही आनंदाची बातमी देऊ. सगळं ठरलं आहे फक्त आता सांगायचं बाकी आहे”. शिवानीच्या बोलण्यावरुन अजिंक्यबरोबर ती लवकरच विवाहबंधनात अडकणार असल्याचं दिसून येत आहे.
