मराठीमध्ये सतत चर्चेत राहणाऱ्या अभिनेत्रींपैकी एक अभिनेत्री म्हणजे सई ताम्हणकर. सई तिच्या कामाबरोबरच खासगी आयुष्यामुळेही चर्चेचा विषय ठरते. आताही ती एका वेगळ्याच कारणामुळे चर्चेत आली आहे. सईच्या ड्रायव्हरला चार अनोळखी तरुणांनी मारहाण केल्याचा प्रकार उघडकीस आला आहे. अगदी शुल्लक कारणावरुन ड्रायव्हरला मारहाण करण्यात आली आहे. सध्या या प्रकाराबाबत सगळीकडेच चर्चा सुरु आहे.
सईचा ड्रायव्हर सद्दाम मंडल हा ३२ वर्षांचा आहे. ‘टाइम्स ऑफ इंडिया’च्या वृत्तानुसार, मालाड परिसरामध्ये सद्दामबरोबर ही घटना घडली. दुचाकीवर असणारे तरुण वेडीवाकडी गाडी चालवत होते. ते पाहता सद्दामने दोनवेळा हॉर्न वाजवला. मात्र या तरुणांनी सद्दामने हॉर्न वाजवला म्हणून त्याला थेट मारहाण करण्यास सुरुवात केली.
आणखी वाचा – वडिलांच्या निधनानंतर रुग्णालयात भरती होती गश्मीरची आई, अभिनेत्याचा खुलासा, म्हणाला, “आई आता…”
सद्दामने हॉर्न वाजवल्यामुळे तरुणांना राग अनावर झाला. या संपूर्ण प्रकारामध्ये जखमी झालेल्या सईच्या ड्रायव्हरला रुग्णालयामध्ये भरती करण्यात आलं. रविवारी (१३ ऑगस्ट) हा संपूर्ण प्रकार घडला. सद्दाम सईच्या गाडीमधून त्याच्या घरी जात असताना त्याला या प्रसंगाचा सामना करावा लागला. सद्दामला मारहाण केल्याप्रकरणी या तरुणांविरोधात पोलिसांमध्ये तक्रार दाखल करण्यात आली आहे.
पण सद्दामला मारहाण करणारे तरुण नेमके कोण होते? याचा तपास पोलीस करत आहेत. गेल्या सहा वर्षांपासून सद्दाम सईकडे ड्रायव्हर म्हणून काम करत आहे. या प्रकरणामध्ये पुढे काय घडणार? हे येत्या काही दिवसांमध्ये समोर येईल. पण सध्या तरी सईने या संपूर्ण प्रकाराबाबत बोलणं टाळलं आहे. सई सध्या तिच्या आगामी प्रोजेक्ट्समध्ये व्यग्र आहे. शिवाय ‘महाराष्ट्राची हास्यजत्रा’ कार्यक्रमालाही आता सुरुवात झाली आहे. या कार्यक्रमाच्या परीक्षक पदी सई आहे.
