मराठी अभिनेत्री राधिका देशपांडे हिने आजवर अनेक मराठी मालिकांमधून तसेच नाटकांमधून प्रेक्षकांच्या मनावर राज्य केलं आहे. राधिका सोशल मीडियावरही प्रचंड सक्रिय असल्याचं पाहायला मिळतं. याशिवाय अनेक घडामोडींवर ती पोस्टमधून व्यक्त होताना दिसते. यामुळे बरेचदा अभिनेत्रीला ट्रोलिंगचा सामना ही करावा लागला आहे. अशातच अभिनेत्री सोशल मीडियावरील एका पोस्टमुळे चर्चेत आली आहे. काल (२२ जानेवारी) रोजी संपूर्ण भारतात राम प्रतिष्ठापनेचा दिवस अगदी थाटामाटात साजरा करण्यात आला. (Radhika Deshpande Post)
अशातच हा दिवस राधिका देशपांडे हिने वेगळ्याच भक्तिभावाने साजरा केला. याबाबतची एक खास पोस्ट अभिनेत्रीने तिच्या सोशल मीडिया अकाउंटवरुन शेअर केली आहे. बाजारपेठेतील एका भाजी विक्रेत्याचा एक व्हिडीओ शेअर करत अभिनेत्रीने पोस्ट शेअर केली आहे. ही पोस्ट शेअर करत अभिनेत्रीने कॅप्शन देत लिहिलं आहे की, “दिवस मोठा होता. काल प्रभू श्री राम आले. सर्वत्र आनंद ओसंडून वाहत होता. एका कोपऱ्यात हे आजोबा बेंबीच्या देठापासून चाळीस रुपयाला एक जुडी विकायचा प्रयत्न करत होते. त्यांचा आवाज काही सेकंद माझ्या कानात घुमत राहिला. एकीकडे नाटकाच्या प्रयोगाची पहिली घंटा वाजली होती. पण हे काम मला करायचं होतं. आजच. कोणतं? व्हिडिओ बघा” असं म्हटलं.
यापुढे अभिनेत्रीने असं लिहिलं आहे की, “माझी आई म्हणते, “काही ठिकाणी भाव करायचा नाही. तर काही ठिकाणी भाव केल्याशिवाय काहीही विकत घ्यायचं नाही. संपूर्ण दुकान विकत घेतलं न भाव करता. पोटासाठी काम करणारे आजोबा आज पोटभर नक्की जेवतील याची सोय केली. दिवस रामाचा. काम रामाचं. एखाद्या नाटक सिनेमातला प्रसंग आठवला “महाराज, अभिनंदन! राणी सरकारला मुलगा झाला. मग राजा कसलाही विचार न करता त्याच्या गळ्यातली रत्नजडित माळ सुईणीला देतो. तसचं काहीसं. आनंद तर मलाही झाला होता प्रचंड. मी ही राणी सरकार असल्यासारखा आनंद लुटला. दिसेल त्याला कोथिंबीर वाटत सुटले. नाटकातल्या कलाकारांनी माझ्या या कामाचे स्वागतच केले. आणि आनंदाने कोथिंबीर घरी नेली”.
शेवटी अभिनेत्रीने तिच्या लेकीला सल्ला देत म्हटलं की, “आईने जे सांगितले ते माझ्या मुलीला मी सांगितलेच आहे पण त्यात एक जुडी आणखीन जोडीन. “अंतरा, आयुष्यात काही दिवस असे येतील त्या दिवशी भाव करायचा नाही. आणि चांगले काम केले हे सांगताना भाव खायचा नाही”. त्या आजोबांच्या घरी दिवाळी आली की नाही माहित नाही पण मी मात्र दिवाळी अशी साजरी केली. कारण दिवस मोठा होता. आणि मन मोठं का छोटं, ते कसं मोजता येईल? मनात राम होता आणि तो मनात घर करुन राहिला”. राधिकाच्या या पोस्टवर अनेकांनी कमेंट करत तिचं कौतुक केलं आहे. “त्या आजोबांचं निर्मळ हास्य ही तुझी कमाई” असं म्हणत समीर चौघुलेने राधिकाच्या पोस्टवर कमेंट केली आहे.
