अयोध्येत राम मंदिर प्राणप्रतिष्ठा सोहळा (२२ जानेवारी) रोजी पार पडला. या खास दिवसाचं सर्व भारतीयांनी जल्लोषात स्वागत केलं आणि हा दिवस मोठ्या उत्साहाने साजरा केला. यावेळी अनेक सिनेकलाकारांनी व दिग्गज मंडळींनी उपस्थिती दर्शवत या सोहळ्याला चारचाँद लावले. दरम्यान अनेक कलाकार मंडळींनी घरच्या घरीच श्रीरामाच्या प्राणप्रतिष्ठा सोहळ्याचं घरच्या घरी आयोजन केलं होतं. अशातच दिग्दर्शक प्रवीण तरडे यांनी देखील त्यांच्या राहत्या घरी श्रीरामाची प्राणप्रतिष्ठा केली. याचा सुंदर व्हिडीओ त्यांच्या पत्नी स्नेहल यांनी इन्स्टाग्रामवर शेअर केला आहे. (Pravin Tarde Wife Post)
स्नेहल यांनी शेअर केलेल्या व्हिडीओमध्ये अयोध्येच्या राममंदिराची प्रतिकृती असलेली सुंदर रांगोळी पाहायला मिळत आहे. शिवाय श्रीराम प्रभुच्या आगमनासाठी पारंपरिक सजावट केलेली पाहायला मिळाली. त्यांचा हा भक्तीत तल्लीन झालेला व्हिडीओ त्यांच्या पत्नी स्नेहल तरडे यांनी त्यांच्या इन्स्टाग्राम अकाउंटवरुन शेअर केला आहे. या व्हिडीओने साऱ्यांचं लक्ष वेधून घेतलं आहे.
स्नेहल यांनी हा व्हिडीओ शेअर करत असं म्हटलं आहे की, “सीतापती प्रभू श्रीरामचंद्र यांस साष्टांग दंडवत. प्रभू, त्रेतायुगात तुम्ही १४ वर्षे वनवास भोगला आणि या घोर कलियुगाने मात्र तुम्हाला तब्बल ४९६ वर्षांसाठी वनवासात धाडले. यासाठी काळ तुमचा क्षमाप्रार्थी आहे. परंतु ज्याप्रमाणे त्रेतायुगीन वनवासात तुम्हाला अनेक भक्तांनी यथाशक्ती सर्वतोपरी मदत केली, प्रसंगी प्राणांचे बलिदान दिले त्याचप्रमाणे कलियुगातही अनेक वीर भक्तांनी रामकार्यासाठी जीवन समर्पित केले. नि:शस्त्र भक्तांवर अंदाधुंद गोळीबार करण्यात आला त्यावेळी प्राणांची आहुती दिलेल्या भक्तांच्या रक्ताने शरयू नदीचे पाणीदेखील लाल झाले” असं म्हणाली.
यापुढे तिने असंही म्हटलं की, “कलियुगातील रामायणाचा हा रक्तरंजित अध्याय संपवून, राक्षसी वृत्तींचा पराभव करुन अखेरीस तुम्ही स्वगृही अयोध्येस परतत आहात. प्रभू तुमचे स्वागत असो. आज आम्हा समस्त सनातन हिंदू धर्मियांना, तुमच्या भक्तांना अपार आनंद होत आहे. तुम्ही अयोध्येस परत आला आहात म्हणजे आता या भारतवर्षात रामराज्य पुन्हा सुरु झाले आहे असेच आम्ही सर्वजण मानतो. कलियुगातील या रामराज्यात भारत देश धार्मिक, आध्यात्मिक, सांस्कृतिक, सामाजिक, राजकीय, आर्थिक या सर्व स्तरांवर प्रगतीशील होवो, येथे समृद्धी नांदो हीच तुमच्या चरणी प्रार्थना. सीतापती श्रीरामचंद्र की जय. सनातन हिंदू धर्म की जय. यतो धर्मस्ततो जयः ” असं म्हणत रामभक्तीचा व्हिडीओ सोशल मीडियावरुन पोस्ट केला आहे.