आनंद, सुख, शांती यांची आरास सजवणारा सण म्हणजे दिवाळी. सध्या सर्वत्र दिवाळीची धामधूम सुरु आहे. ठिकठिकाणी रंगेबेरंगी आकाशकंदील, विविध प्रकारच्या पणत्या, फटाक्यांची आतिषबाजी आणि खमंग असा फराळ या सर्व गोष्टींनी शहर गजबजलेलं दिसतंय. अशातच प्रेक्षकांची लाडकी कलाकार मंडळी देखील या सणाचा आनंद घेताना दिसत आहेत. मराठी मनोरंजन विश्वातील लाडकी जोडी म्हणजेच अशोक सराफ व निवेदिता सराफ यांनी सुद्दा दिवाळीच्या फराळाचं आमंत्रण देत दिवाळीच्या शुभेच्छा देत एक व्हिडीओ सोशल मीडियावरून शेअर केला आहे. (Nivedita Saraf And Ashok Saraf Diwali Video)
दिवाळीनिमित्त अशोक सराफ व निवेदिता सराफ यांनी एक फराळ करतानाचा व्हिडीओ शेअर केला आहे. या व्हिडिओमध्ये अशोक सराफ व निवेदिता सराफ हे अगदी पारंपरिक लूकमध्ये फराळाचं ताट घेऊन बसलेले दिसत आहेत. या व्हिडिओमध्ये निवेदिता यांनी स्वतःच्या हाताने फराळ बनवलेला पाहायला मिळतोय. इतकंच नव्हे तर अशोक सराफ हे निवेदिता यांनी बनवलेला फराळ खात त्यांचं कौतुक करताना ही दिसत आहेत.
हा व्हिडीओ शेअर करत, निवेदिता म्हणताना दिसत आहेत की, “सराफांच्या घरचा फराळ तयार आहे. मस्त छान पातळ पोह्यांचा चिवडा, चकली, शेव आणि खाजाचे कानवले याचे रंग बघा किती मस्त आहेत. तसेच गुळपापडीचे लाडू. असं म्हणून त्या अशोक सराफ यांना विचारतात, ‘तर तू काय खाणार आहेस?’, यावर उत्तर देत, अशोक मामा गमतीत म्हणतात, ‘मी सगळंच खाणार आहे’. त्यावर त्या चकली खाऊन बघ, असं म्हणत चकली अशोक मामांच्या हातात देतात. यावर अशोक सराफ, ‘खूप छान चकली केली आहेस’ असं म्हणत निवेदिता यांची स्तुती करतात. त्यानंतर त्या खाजाचे कानवले त्यांना खायला देतात, तो खाऊनही ‘छान आहे’ असं म्हणत ते निवेदिता यांनी बनवलेल्या खाद्यपदार्थांची स्तुती करतात. या व्हिडिओमध्ये दोघांच्याही चेहऱ्यावर आनंद ओसंडून वाहताना दिसतोय. त्यांनतर त्यांनी त्यांच्या चाहत्यांना दिवाळीच्या शुभेच्छा ही दिल्या आहेत.
या व्हिडिओ मध्ये निवेदिता त्यांनी बनवलेल्या फराळाची नाव सांगत अशोक सराफ त्या फराळाचा चांगलाच आस्वाद घेताना दिसत आहेत. निवेदिता सराफ- अशोक सराफ यांच्या सह अन्य कलाकारांनी देखील दिवाळीच्या शुभेच्छा देत विविध व्हिडीओ शेअर केले आहेत.