mumbai cab service issues : अनेक कलाकार आहेत जे वेळोवेळी त्यांचे चांगले, वाईट अनुभव चाहत्यांसह शेअर करतात. बरेचदा हे कलाकार ट्राफिक मध्ये आलेल्या अडचणी, प्रवासादरम्यान आलेले अनुभव तसेच इतरही काही समस्या शेअर करतात. अशातच एका अभिनेत्री आणि लेखिकेने ओला या प्रवासी कंपनीवर आक्षेप घेत आवाज उठविला असल्याचं म्हटलं आहे. अभिनेत्री व लेखिकेने केलेली पोस्ट एका लोकप्रिय कॅब कंपनीबद्दल केलेल्या तक्रारीची आहे. ही अभिनेत्री व लेखिका म्हणजे मधुगंधा कुलकर्णी. मधुगंधाने तिला सहन कराव्या लागलेल्या त्रासाविषयी सोशल मीडियाद्वारे भाष्य केले आहे.
अभिनेत्रीने Ola या कॅब कंपनीच्या सेवेचा वापर केल्यानंतर नियमित बिल भरुनही दंड भरण्यासाठी सतत मॅसेज केल्याप्रकरणी आवाज उठविला आहे. अभिनेत्री म्हणाली, ‘मी ओला पोस्टपेड ग्राहक आहे. माझे बिल 4 सप्टेंबर 2025 रोजी भरायचे होते, परंतु मी 31 ऑगस्ट 2025 रोजी आधीच पेमेंट केले. असे असूनही, मला अजूनही ओला टीमकडून 100 रुपयांचा दंड भरण्याचे मेसेज वारंवार येत आहेत आणि मी एकूण 601 रुपये भरले आहेत. मी आधीच पुराव्यासह आणि पेमेंट केल्याच्या स्क्रीनशॉटसह तीन ईमेल पाठवले आहेत, तरीही कोणताही तोडगा काढण्यात आलेला नाही”.
पुढे तिने म्हटलं आहे की, “बहुतेक ओला ड्रायव्हर्स गाडी चालवताना सतत फोनवर बोलत असतात, जे आमच्या सुरक्षेच्या दृष्टीने धोकादायक आहे. आता, वेळेवर पैसे भरल्यानंतरही मला दंड भरावा लागेल अशा मेसेजद्वारे त्रास दिला जात आहे. ओला कंपनीकडून ग्राहकांना अशीच वागणूक दिले जाते का? ही एकप्रकारची फसवणूक आहे का? बऱ्याचदा जेव्हा तुम्ही पेमेंट करण्याचा प्रयत्न करता तेव्हा मेसेजमध्ये असलेली लिंक कामी येत नाही. जेणेकरुन आपल्याला पेमेंट करायला उशीर व्हावा आणि त्यामुळे ते दंडाची रक्कम वसूल करू शकतात, असे तर नाही ना?”.
आणखी वाचा – गावाकडे रमलीय अश्विनी महांगडे, चुलीवर भाकऱ्या थापतानाही दिसली आणि…; साधेपणाचं होतंय कौतुक
मधुगंधाने संबंधित कॅब सर्व्हिस कंपनीला या पोस्टमध्ये टॅगही केले आहे. ओला कॅबच्या अधिकृत इन्स्टाग्राम अकाउंटवरुन या पोस्टवर अशी कमेंट करण्यात आली आहे की, “मधुगंधा कुलकर्णी, आम्हाला विश्वास आहे की तुमची चिंता दूर करण्यात आली आहे आणि त्याविषयी तुम्हाला ईमेलद्वारे कळवण्यात आले आहे. अपडेटसाठी कृपया ईमेल पाहा. तुम्हाला काही मदत हवी असल्यास DM द्वारे आमच्याशी संपर्क साधा”.
