Ashvini Mahangade Instagram : बरेचदा कलाकार मंडळींचा साधेपणा प्रेक्षकांना विशेष भावतो. बरीच अशी कलाकार मंडळी आहेत ज्यांचे आजवर त्यांच्या साधेपणामुळे कौतुक झाले आहे. बरेच असे कलाकार आहेत जे गावाकडे जाऊन शेती करतात. गावच्या लोकांसह गावच्या वातावरणात रमतात. बरेचसे कलाकार हे मुंबईतील नसून पुणे, साताराकडचे आहेत. त्यामुळे त्यांची घर ही गावाकडे आहेत. त्यामुळे शूटिंगच्या व्यस्त वेळापत्रकातून वेळ काढत ही मंडळी घराकडे गावी जाताना दिसतात. गावी जात ते गावच्या वातावरणात मिसळून अनेकदा काम करताना दिसतात. अशातच अभिनेत्री अश्विनी महांगडे हिनेदेखील गावाकडे जात गावच्या घराची झलक शेअर केली आहे.
अभिनेत्री अश्विनी महांगडे यापूर्वी अनेकदा तिच्या वाई येथील घरी जाताना दिसते. इतकंच नव्हेतर ती त्यांच्या शेतात शेती करतानाही दिसली आहे. आताही अश्विनी तिच्या घरी गेली आहे. आणि घराच्या मागच्या खोलीतील एक सुंदर आठवण तिने शेअर केली आहे. यामध्ये ती चुलीवर स्वतःच्या हाताने जेवण बनवताना दिसत आहे. ती भाकऱ्या थापताना दिसत असून ती तिच्या दोन्ही भावंडांना खाऊ घालताना दिसत आहे.
ही आठवण शेअर करत तिने कॅप्शन देत म्हटलं, “नानांनी खूप प्रेमाने बंगला बांधला आणि सगळ्यात मागे एक खोली काढली ती चुलीसाठी. बऱ्याचदा आम्ही जेवायला इथेच बसतो. पण मला वाटते आमच्या यात्रेला या खोलीचा सगळ्यात जास्त उपयोग होतो. हा फोटो मला फार आवडला कारण घरात मी मोठी असल्या कारणाने मी भाकरी करत आहे आणि माझी दोन्हीही लहान भावंडं म्हणजे जिजा आमच्या वकिलीनबाई व बद्रीशेट उद्योजक जेवणाचा आनंद घेत आहेत. त्यांच्याबरोबर आमचा राया”.
पुढे ती म्हणाली, “‘स्वराज्य’ आमच्या घराचे नाव देताना नानांनी त्यांची जबाबदारी पार पाडली आणि ते स्वराज्य वाढवण्याची, टिकवण्याची जबाबदारी आम्ही पार पाडण्याचा प्रयत्न करत आहोत”. अश्विनीचा हा फोटो पाहून अनेकांनी तिच्या साधेपणाचं कौतुक केलं आहे.
