कलाकार मंडळी म्हटलं की ट्रोलिंग हे आलंच. बरीचशी कलाकार मंडळी अशी आहेत जी ट्रोलिंगकडे दुर्लक्ष करतात. तर काही कलाकार मंडळी या ट्रोलिंगकडे लक्ष देत नेटकऱ्यांना सडेतोड उत्तर देतात. अशातच एका मराठमोळ्या अभिनेत्रीने या ट्रोलिंगवर व राजकारणावर आपलं मत स्पष्ट केलं आहे. ही अभिनेत्री म्हणजे दीपाली सय्यद. दीपाली सय्यदने आजवर तिच्या अभिनयशैलीने गेली २५ वर्ष प्रेक्षकांच्या मनावर राज्य केलं आहे. अभिनयसृष्टीप्रमाणेच दीपाली राजकारणातही सक्रिय असते. राजकारण व अभिनय या दोन्ही क्षेत्रात काम करत असताना अभिनेत्रीला बरेचदा ट्रोलिंगला समोर जावं लागलं. (Deepali Sayed On Trolling)
नुकतीच अभिनेत्रीने ‘इट्स मज्जा’ या युट्युब चॅनेलला मुलाखत दिली. यावेळी बोलताना तिने तिच्या वैयक्तिक आयुष्यामुळे व व्यासायिक आयुष्यामुळे नेटकऱ्यांनी केलेल्या ट्रोलिंग बद्दल सांगितलं. अभिनेत्री म्हणाली, “ट्रोलिंगकडे दुर्लक्ष करायचं. आपण ट्रोल होत आहोत म्हणजे हिट आहोत. मी ट्रोलिंगला सकारात्मक दृष्टिकोनातून बघते. ट्रोल झाल्यावर खूप मजबूत व्हावं लागणार आहे. हृदयाला इतकं निगरगट्ट बनवायला लागणार आहे, दगड बनवावं लागणार आहे. पण आता मी ट्रोलर्सकडे लक्षच देत नाही. जितके तुम्ही त्या कमेंट वाचणार तेवढं तुम्हाला त्रास होणार. काही काही तर माणसं त्यासाठीच बसवलेली असतात, ट्रोलिंग करण्यासाठी. ट्रोलर काय आहेत, त्यांना काही काम नाही”.
“आजकाल गरीब आणि श्रीमंत दोघांकडेही मोबाईल आहे. सगळ्यांकडे काही नसेल तरी चालेल पण मोबाईल आहे. प्रत्येकाचं डोकं ज्या पद्धतीने चालतं त्या पद्धतीने ते टाइप करतात. त्यांच्याकडे मी आता लक्ष देत नाही. कलाकार हा खूप भावनिक असतो. आणि तो जेव्हा उतरतो ना तेव्हा व सच्चाईने उतरतो. त्याला जे काही करायच त्यासाठीच उतरतो. मला सुरुवातीला काहीच इंटरेस्ट नव्हता. पण आपचं तिकीट आलं. सगळ्यांनी सांगितलं तुझ्यात ते गुण आहेत, तू करू शकते, तू कर. एकदम शेवटच्या क्षणाला मी हो म्हटलं. आणि बाप रे बाप, तेव्हा पहिल्यांदा मी ट्रोलिंगला सामोरी गेले”.
पुढे ती म्हणाली, “आज मी जेवढं सांगत आहे ना की ट्रोलकडे लक्ष देऊ नका तेव्हा मी लक्ष दिलं होतं. आणि तेव्हा मी भर पत्रकार परिषदेत रडले होते. कारण इतकं ट्रोलिंग झालं होतं. एकतर माझ्या नावाला घेऊन ट्रोलिंग झालं होतं, मी मुसलमान व्यक्तीशी लग्न केलं म्हणून ट्रोलिंग झालं होतं. त्या गोष्टीवरून मला कळलं राजकारण इतकं सोपं नाही आहे, आपल्याला खूप स्ट्रॉंग व्हावं लागणार आहे”.
