मराठी मनोरंजन विश्वातील बहुआयामी अभिनेत्री म्हणून मुक्ता बर्वेचा उल्लेख हा केलाच जातो. मराठी नाटक, मालिका, चित्रपट अशा तिन्ही माध्यमांतून अभिनेत्रीने आजवर प्रेक्षकांचे मनोरंजन केले आहे. आपल्या अभिनयाने कायमच चर्चेत असणारी ही अभिनेत्री सध्या तिच्या नाच गं घुमा या चित्रपटामुळे चांगलीच चर्चेत आहे. १ मे रोजी हा चित्रपट प्रदर्शित झाला असून सर्वत्र याच चित्रपटाची व या चित्रपटातील मुक्ताच्या अभिनयाचे कौतुक केले जात आहे. मुक्ता तिच्या ‘चारचौघी’ नाटकाच्या दौऱ्यानिमित्त परदेशात असून तिला सध्या भारताची आठवण येत आहे. यानिमित्ताने तिने नुकतीच सोशल मीडियावर एक पोस्ट शेअर केली आहे.
मुक्ताने शेअर केलेल्या या पोस्टमध्ये तिने असं म्हटलं आहे की, “तुम्हाला माहित आहे का, मी आत्ता भारतात नाही आहे. कदाचित पहिल्यांदाच असं झालं असेल की, माझ्या चित्रपटाच्या प्रदर्शनाला मी नाही. त्यामुळे ‘नाच गं घुमा’ प्रदर्शित झाल्यापासून मला अस्वस्थ वाटत आहे. आम्ही कलाकार कलाकृती यासाठीच बनवतो की, ती प्रेक्षकांनी बघावी आणि भरभरून प्रेम करावं आणि प्रेक्षक चित्रपट बघून कौतुकाने आम्हाला डोक्यावरही घेत आहेत. पण हे सर्व मी चित्रपट बघण्याआधीच होत आहे.”
आणखी वाचा –
यापुढे तिने असं म्हटलं आहे की, “सध्या चित्रपटाचं भरभरून कौतुक होत आहे. प्रेक्षकांना चित्रपट आवडत आहे, पण मी अजूनही चित्रपट पाहिलाच नाही आणि मला त्याची रुखरुख वाटते आहे. पण हरकत नाही, माझ्या नाटकावर माझं प्रेम आहे. माझ्या नाटकासाठी मी वचनबद्ध आहे आणि मी इकडे माझ्या ‘चारचौघी’ नाटकाचे दौरे अगदी उत्साहाने करते आहे. पण मनाने मी माझ्या टीमबरोबर, प्रेक्षकांबरोबर आणि माझ्या मराठी माणसांबरोबर आहे.”
आणखी वाचा –
यापुढे तिने चित्रपटाबद्दल उत्सुकता दर्शवत असं म्हटलं आहे की, “मी आता खूप आतुर आहे की, कधी मला माझाच (म्हणजेच आपला चित्रपट) चित्रपटगृहात जाऊन सर्वांबरोबर बघता येईल. त्यामुळे इथले सर्व प्रयोग यशस्वीरीत्या पार पाडून मी लवकरच भारतात येत आहे. माझ्या अनुपस्थितीमुळे जी काही कमी राहिली आहे ती मी आता भरून काढणार आहे. येत्या १२ मे पासून मी तुमच्याबरोबर असणार आहे. त्यामुळे लवकरच भेटूया आणि मज्जा करूया. तोपर्यंत चित्रपटगुहात ‘घुमोत्सव’ असाच उत्साहात साजरा होत राहू दे.
