स्त्री म्हटल्यावर ती सूपरवुमनच असली पाहिजे असे अनेक समज-गैरसमज असूनही समाजात आहेत. तिला प्रत्येक काम आलं पाहिजे हा मोठा अट्टाहास. पण काही कलांमध्ये ती प्रगत असेल आणि एखादं काम स्त्रीला आलंच नाही तर तिच्याकडे वेगळ्या नजरेने का पाहिलं जातं? हा मोठा प्रश्नच आहे. बरं याबाबत फारसं कोणीच उघडपणे बोलतंही नाही. मात्र ‘आई कुठे काय करते’ फेम मधुराणी प्रभुलकरने हे धाडस केलं. तिला स्वतःला स्वयंपाक करता येत नाही. त्याची आवडही नाही. वेळ पडली तर डाळ, भात, भाजी इतकं साधं ती करु शकते. पण यावरुनही मधुराणीला बरंच हिणवलं गेलं. याचविषयी तिने आता रोखठोक मत मांडलं आहे. (Madhurani Prabhulkar not interested in cooking)
आरपारला दिलेल्या मुलाखतीत तिने स्त्रिया व समाजाबाबतचे स्पष्ट मत मांडले. तसेच स्वयंपाक येत नसल्याचीही उघडपणे कबुली दिली. मधुराणी म्हणाली, “मला स्वयंपाक करता येत नाही. पण मला त्याची आवड नाही. म्हणजे ते काय तरी भिजवत ठेवा, मग ते उकळत घाला, त्याच्यात हे ते पदार्थ घाला, परत २० मिनिटं तसंच ठेवा असं कायतरी ते खूप गोंधळून टाकणारं असतं. मला भिती वाटते. मला नाही जमत ते. रोजचं भाजी, भात, वरण इतकं साधंच जमतं”.
“त्या गोष्टीवरुन खूप वर्ष माझ्या मनात अपराधीपणाची भावना होती. मला असं वाटायचं की, मी स्त्री म्हणून जगत असताना कायतरी कमी पडतंय का?. स्वयंपाकाची आवड कशी नाही? असं मला सतत वाटायचं. बरं आजूबाजूच्या परिस्थितीनेही मला तसंच बघितलं. स्वयंपाक येत नाही म्हणून मला हिणवलंच होतं. आता कुठेतरी जाऊन मी स्वतःला सांगते आणि स्वीकारते की, हो नाही येत मला स्वयंपाक तर ठीक आहे. गरज पडली तर हात पाय हलवून चार लोकांना मी जेवायला घालू शकते”.
“पण आवडीने तुम्ही या घरी मी हे करते ते करते इतकं मला नाही होत. तो माझा झोन नाही. स्त्रीकडे जी गोष्ट नाही त्याच गोष्टीवरुन तिला कायम जज केलं जातं. सुपरवूमनच्या चौकटीत स्त्रिया स्वतःचीच खूप घुसमट करुन घेतात. आपण सगळ्यातच खूप बेस्ट असलं पाहिजे असं कधीच होत नाही. सगळं करण्याची स्त्रियांची ताकद आहे का? तर याचं उत्तर आहे हो. पण अडचणीही तेवढ्याच आहेत. तर कुठेतरी कमी जास्त होणार. तर ठीक आहे”. मधुराणीचे हे विचार खरंच कौतुकास्पद आणि समाजाला विचार करायला लावणारे आहेत.
