मराठी सिनेसृष्टीतील एक काळ गाजवणारे अभिनेते अशोक सराफ यांचे लाखो चाहते आहेत. या महान अभिनेत्याला एकदा तरी पाहावं, भेटावं असा प्रत्येक कलाकाराचा ग्रह असतो. ही कलाकार मंडळी अशोक मामांना भेटायला नेहमीच उत्सुक असतात. अशातच एका मराठमोळ्या अभिनेत्याची अशोक मामांसह भेट झाली. यादरम्यान त्याला झालेला आनंद त्याने इंस्टाग्राम अकाऊंटवरून पोस्ट शेअर करत सांगितला आहे. हा मराठमोळा अभिनेता म्हणजे समीर परांजपे. (Sameer Paranjape On Ashok Saraf)
कलर्स मराठी वाहिनीवरील ‘सूर नवा ध्यास नवा – आवाज तरूणाईचा’ या रिऍलिटी शोमध्ये अभिनेता, गायक समीर परांजपे याने हजेरी लावली आहे. या रिऍलिटी शोमध्ये नुकतीच अशोक सराफ व निवेदिता सराफ या कलाकार जोडीने हजेरी लावली होती. स्पर्धकांच्या सुमधुर आवाजातील गाणी ऐकण्यासाठी अशोक व निवेदिता यांची उपस्थिती होती. यावेळी समीरने अशोक सराफांना भेटल्यानंतरचा अनुभव, त्यांच्याकडून मिळालेली कौतुकाची थाप याबाबत खास पोस्ट शेअर केली आहे.
समीरने निवेदिता सराफ व अशोक सराफ यांच्या बरोबरचा फोटो शेअर करत, “आजचा एपिसोड, आजचं गाणं माझ्या आयुष्यातला तो क्षण आहे जो आयुष्यभर कायम अत्तरासारखा मनात दरवळत राहील आणि मला कायम विचारत राहील गाणं करतोयस ना? शूटींग सुरू झालं अशोक मामांची आणि निवेदिता ताईंची एन्ट्री झाली. मला बघून अशोक मामा म्हणाले अरे तू गातोस? मला वाटलं छान अभिनयचं करतोस फक्त. मी पाहिलंय तुझं काम. छान करतोस काम. ते मला ओळखतात त्यांनी माझं काम पाहिलंय हा माझ्यासाठी अभिनेता म्हणून अभिमानाचा क्षण होता. हो अभिमानच. गर्व म्हणा हवं तर आणि का नसावा?” असं समीरने पोस्टमध्ये म्हटलं आहे.
पुढे समीरने लिहिलं आहे की, “रविवारी दुपारी ४ वाजता दूरदर्शन वर लागणाऱ्या यांच्या फिल्म्स बघत मोठे झालो आणि आज पहिल्यांदा ते भेटतात आणि हे बोलतात अजून काय हवं एखाद्या नवीन अभिनेत्याला. या एपिसोडला गाणं ही ते मिळावं जे मला माझ्या गुरुंनी जवळपास २० वर्षांपूर्वी शिकवलं होतं. प्रोमो बघून नीलूताईंचा म्हणजेच नीलकांती पाटेकर यांचा आशीर्वादरुपी मेसेज यावा कृतज्ञता, रितेपण, वनवास संपल्याचा आनंद हे सगळं मी जगलोय” असं म्हणत त्याने पोस्ट शेअर केली आहे.