Siddharth Chandekar On Mother : मराठी कलाविश्वातील लोकप्रिय अभिनेत्यापैकी एक म्हणजे सिद्धार्थ चांदेकर. सिद्धार्थने आजवर अनेक मराठी मालिका, चित्रपट यांमधून महत्त्वपूर्ण भूमिका साकारत रसिकांच्या मनात घर केलं. सिद्धार्थ त्याच्या व्यासायिक आयुष्याबरोबरच वैयक्तिक आयुष्यामुळेही चर्चेत असलेला पाहायला मिळाला आहे. अशातच सिद्धार्थ त्याच्या आईच्या दुसऱ्या लग्नामुळे चर्चेत आलेला दिसला. सिद्धार्थ चांदेकरच्या आईने २०२४ मध्ये वयाच्या ५४व्या वर्षी दुसरं लग्न करण्याचा निर्णय घेतला. सिद्धार्थने स्वतः त्याच्या आईचं लग्न लावून दिलं, चाहत्यांनी अभिनेत्याच्या या निर्णयाचं कौतुकसुद्धा केलं. आता दोन वर्षांनी सिद्धार्थ त्याच्या आईच्या लग्नाबाबत बोलला आहे.
‘दॅट ऑड इंजिनिअर’ या युट्युब चॅनलला दिलेल्या मुलाखतीदरम्यान सिद्धार्थ चांदेकरला, “जेव्हा आईचं तू लग्न करायचं ठरवलं, तेव्हा विचार नाही आला का? अरे लोकं काय म्हणतील?, असा विचार तुझ्या मनात आला नाही का?”. यावर सिद्धार्थ म्हणाला की, “कुठल्याच माणसाने ज्याचे याबाबतीत काही मत असेल त्याने माझ्या आईच आयुष्य जगलं नाही आहे. त्यामुळे मी आधी आईचा विचार करेल. तिने आम्हाला लाखवेळा विचारलं तुम्हाला हे चालणार आहे का?, आम्ही तिला तुझा आनंद महत्त्वाचा आहे. या संपूर्ण जगात या निर्णयाला घेऊन कोणीही महत्त्वाचं नाही आहे जेवढं माझ्या आईचं मत महत्त्वाचं आहे. आईच्या लग्नाला आता वर्ष होऊन गेलेलं आहे. मी त्या बाईला जेवढं खुश पाहिलंय ना या वर्षभरात तेवढं मी १२-१५ वर्षे घटस्फोटानंतर नव्हतं पाहिलं. आपल्या आईला लागतं ना, गप्पा मारायला, संवाद साधायला किंवा एक असा पुरुष लागतोच ना. बाईला पुरुष लागतोच, पुरुषाला बाई ही लागतेच आणि त्या वयामध्ये जेव्हा मनातलं सांगायला, मुलगा फार नाही पुरत हे लक्षात घ्या”.
आणखी वाचा – “राज ठाकरे मुख्यमंत्री झाले तर…”, तेजस्विनी पंडितच भाष्य, म्हणाली, “स्वतःच्या कुटुंबापेक्षाही…”
पुढे तो म्हणाला, “परत तुमचा मेल इगो थोडासा याबाबतीत बाजूला ठेवा. मी तो पुरुष नाही, जो आईचं सगळं बघू शकेल. मी करेनच म्हणजे लाख मेहनत करेन, मी तिच्यासाठी वाटेल ते करेन. पण तिच्या मेंटल पीससाठी मी काय देऊ शकतो आणि जे या वर्षभरात मी त्या बाईला जेवढं खुश पाहिलेलं आहे, रिलॅक्स पाहिलेलं आहे, मग मला असं वाटतं की, कोणी काही का बोलेना मला काय करायचंय. माझी आई खुश आहे”.
दुसऱ्या लग्नापूर्वी बरीच वर्ष सीमा चांदेकर या एकट्याच संपूर्ण घर सांभाळत होत्या. पण सीमा यांनी नव्याने संसार करायचा ठरवलं आणि लेक सिद्धार्थ व सून मिताली मयेकरनेही त्यांच्या या निर्णयाला हसत होकार दिला. आता सीमा चांदेकर त्यांच्या जोडीदाराबरोबर आनंदाने संसार करत आहेत.
