लेखक, कवी, अभिनेता, दिग्दर्शक, सूत्रसंचालन अशा अनेक क्षेत्रात मुशाफिरी करणारा संकर्षण कऱ्हाडे हा मराठी मनोरंजनसृष्टीतील आघाडीचा कलाकार आहे. नाटक, मालिका, चित्रपट त्याचबरोबर कवितांचे कार्यक्रम अशा माध्यमातून त्याने आपल्या कलेची चुणूक दाखवून दिली. नाटक, मालिका व चित्रपटांत अभिनय करत मनोरंजन करणारा हा अभिनेता लवकरच परिक्षकाच्या भूमिकेतून प्रेक्षकांच्या भेटीला येणार आहे.
झी मराठी वाहिनीवर लवकरच ‘ड्रामा ज्युनिअर्स’ हा नवीन कार्यक्रम प्रेक्षकांच्या भेटीला येणार असून या कार्यक्रमात संकर्षण परिक्षकाच्या भूमिकेत दिसणार आहे. या कार्यक्रमात त्याच्याबरोबर अभिनेत्री अमृता खानविलकरदेखील असणार आहे. मात या कार्यक्रमाच्या परीक्षणासाठी संकर्षणने आधी नकार दिला होता.याबद्दल स्वत: संकर्षणने एक पोस्ट शेअर केली आहे.
संकर्षणने त्याच्या इन्स्टाग्राम अकाऊंटद्वारे एक पोस्ट शेअर केली असून या पोस्टमध्ये त्याने असं म्हटलं आहे की, “पहिल्यांदाच परीक्षक. ‘ड्रामा जूनियर्स’. खरं सांगू का, मी साफ नकोच म्हणलं होतं. वाटलं की, मी का आणि काय कुणाचं परिक्षण करणार? पण झी मराठीने फार विश्वासाने ही जबाबदारी दिली आहे. २००८ साली स्पर्धक म्हणून झी मराठीनेच संधी दिली होती आणि आता त्यांनीच परिक्षकाचा मान दिला आहे. विश्वास ठेवा, मी हेही काम अत्यंत प्रामाणिकपणे करेन. तुमची साथ आहे ना? आहेच असं प्रेमाने व हक्काने गृहीत धरतो. कामाला लागतो”
संकर्षणचे रंगभूमीवर सध्या ‘नियम अटी लागू’, ‘तू म्हणशील तसं’ या नाटकांसह त्याचा ‘संकर्षण व्हाया स्पृहा’ हा कवितांचा कार्यक्रमही सुरू आहे. त्याच्या या नाटक व कवितांच्या कार्यक्रमांना प्रेक्षकांचा चांगलाच प्रतिसादही मिळत आहे. तसेच आता या नवीन कार्यक्रमासाठी त्याचे अनेक चाहते उत्सुक आहेत.
दरम्यान, ‘ड्रामा जूनियर्स’ या कार्यक्रमात सूत्रसंचालनाची जबाबदारी पार पाडण्यासाठी झी मराठी वाहिनीचा अनेक वर्षांपासूनचा लोकप्रिय चेहरा झळकणार आहे. हा लोकप्रिय चेहरा म्हणजेच अभिनेत्री श्रेया बुगडे. त्यामुळे आता या नवीन कार्यक्रमासाठी अनेक चाहते या शोची आतुरतेने वाट पाहत आहेत.