Pushkar Shrotri Father Death : सुप्रसिद्ध अभिनेता पुष्कर श्रोत्रीच्या कुटुंबावर दुःखाचा डोंगर कोसळला आहे. अभिनेत्याचे वडील सुधाकर श्रोत्री यांचे निधन झाले आहे. विलेपार्ले येथील निवासस्थानी रविवारी वृद्धापकाळाने निधन झाले असल्याची प्राथमिक माहिती समोर आली आहे. वयाच्या ८९ व्या वर्षी त्यांनी अखेरचा श्वास घेतला. सुधाकर श्रोत्री यांनी वृत्तपत्र वितरण क्षेत्रातील ज्येष्ठ आणि मान्यवर व्यक्तिमत्त्व म्हणून ओळख मिळवली. त्यांच्या निधनाने वृत्तपत्र वितरण क्षेत्रासह सामाजिक आणि साहित्य क्षेत्रातही हळहळ व्यक्त होत आहे. त्यांच्या पार्थिवावर आज सोमवार, २ मार्च रोजी सकाळी ८ वाजता विलेपार्ले येथील पारशीवाडा स्मशानभूमीत अंत्यसंस्कार करण्यात आले आहेत.
सुधाकर श्रोत्री यांनी तब्बल ६५ वर्षे टाइम्स वृत्त समूहात काम करत वृत्तपत्र वितरण व्यवस्थेचा भक्कम पाया घालण्यामध्ये मोलाचे योगदान दिले. प्रत्येक राज्य आणि तालुक्यातील वृत्तपत्रविक्रेते आणि एजंट यांची नावे तोंडपाठ असणं हीच त्यांच्या कामाची पोचपावती आहे. सुधाकर श्रोत्री यांनी वृत्तपत्र क्षेत्रातील कामाबरोबरच साहित्याचीही आवड जोपासली. त्यांनी अनेक कविता लिहिल्या असून, त्यांच्या ‘वडिलोपार्जित’, ‘लेडीज स्पेशल’ आणि माजी क्रिकेटपटू सचिन तेंडुलकर यांच्यावर आधारित ‘खास सचिन’ या कविता संग्रहांचे प्रकाशन झाले आहे.
आपल्या जडणघडणीत वडिलांचा मोलाचा वाटा असल्याचं अभिनेता पुष्कर श्रोत्री यांनी अनेक वेळा मुलाखतींमध्ये सांगितलं आहे. वडिलांच्या जाण्याने पुष्कर यांच्यासह त्यांच्या कुटुंबावर दुःखाचा डोंगर कोसळला आहे.
