मराठी सिनेसृष्टीतील बरीच अशी कलाकार मंडळी आहेत ज्यांनी आजवर स्वमेहनतीने शून्यातून विश्व निर्माण केलं आहे. ही कलाकार मंडळी अभिनयाचा कोणताही वारसा नसताना केवळ आपल्या कलेच्या जोरावर सिनेसृष्टीत आपलं स्थान निर्माण करतात. यांत एका विनोदवीराचं नाव आवर्जून घेतलं जाईल ते म्हणजे अभिनेते भरत जाधव. आजवर भरत जाधव यांनी अतिशय कष्टाने डोलारा उभा केला आहे. सिनेसृष्टीत त्यांनी स्वतःच्या अभिनय कौशल्याने चाहतावर्ग निर्माण केला आहे. (Bharat Jadhav Shared Incident)
पहिली व्हॅनिटी व्हॅन, पहिली मर्सडिज घेणारा हा मराठी सिनेसृष्टीतील पहिला कलाकार असे अनेक रेकॉर्ड्स आजवर भरत जाधव यांच्या नावे आहेत. त्यांच्या गाडीचा एक किस्सा भरत जाधव यांनी ‘एबीपी माझा’च्या ‘माझा कट्टा’ला दिलेल्या मुलाखतीत सांगितला. त्यावेळी बोलताना भरत जाधव म्हणाले की, “काम समोर दिसलं की मी कर्ज घ्यायचो. कोणतीही ब्रँडची गाडी घेतली तर त्या प्रत्येक ब्रँडच्या गाडीचं स्टेरिंग माझ्या वडिलांच्या हातात असावं असंच मला वाटायचं. शिवाय मी जेवढ्या पण गाड्या घेतल्या त्या सर्व कर्ज घेऊनचं घेतल्या आहेत आणि काम करून ते कर्जही फेडलं आहे. नाटकात येण्याआधीपासून माझी एक सवय होती, जमीन दिसली की विचारायचं ‘काय रेट चालला आहे?’. फक्त एवढीच माझी सवय होती.”
यापुढे बोलताना ते म्हणाले, “मी मराठी कलाकार आहे तर असे कितीसे पैसे माझ्या खिशात असणार. आणि मी घेतलेली पहिली व्हॅनिटी व्हॅन ही माझी गरज होती, म्हणून ती माझ्याजवळ आहे. एकदा मी कोल्हापूरला जाताना बीएमडब्ल्यू एक्स ५ घेऊन गेलो होतो. जेव्हा त्यांच्या हातात स्टेरिंग दिलं तेव्हा ते गेअर शोधायला लागले. मी म्हटलं याला गेअर नसतो ही ऑटोमॅटिक आहे. त्यावर वडील म्हणाले, “कसली गाडी घेतलीय. ड्रायव्हरला गेअर पाहिजे. ड्रायव्हरला गेअरशिवाय गाडी चालवायला मज्जा नाही.”
गेअरशिवाय गाडी चालवायला मजा नाही हे ऐकून भरत जाधव चकित झाले. आणि म्हणले, “मी ७२ लाखाला ही गाडी घेतली आहे. ते चुलीत घाल पैसे त्याला काही महत्त्व नाही असं ते काहीच विचार न करता म्हणाले. त्यावेळी त्यांनी हा विचारपण केला नाही की, मी किती रक्कम बोलत आहे. आयुष्यभर टॅक्सी ड्रायव्हर म्हणून काम केलं त्यामुळे गाडीला गेअर असणं असं त्यांच्या दृष्टीने महत्वाचं होतं”.