amol bawdekar heart attack : अभिनयासाठी कलाकार हा नेहमीच तत्पर असतो. एखादा शो करताना तो त्याचे वैयक्तिक अडथळे विसरुन अभिनयाला प्राधान्य देत काम करतो. बरीच अशी कलाकार मंडळी आहेत ज्यांनी आजवर त्यांच्या कठीण काळाला बाजूला ठेवून सिनेसृष्टीत नेहमीच मनोरंजनासाठी पुढाकार घेतला. अशातच एका मराठमोळ्या अभिनेत्याबाबत एक मोठी अपडेट समोर आली आहे. अभिनेते अमोल बावडेकर यांना हृदयविकाराचा झटका आल्याने ‘सुंदर मी होणार’ या नाटकाचा प्रयोग रविवारी सकाळी रद्द करावा लागला. मुंबईतील विलेपार्ले येथील दीनानाथ नाट्यगृहात हा प्रयोग होणार होता.
अमोल बावडेकर यांच्यावर अँजिओग्राफी करण्यात आली असून त्यांची प्रकृती आता स्थिर आहे. मात्र प्रकृती ठीक नसतानाही प्रयोग करु देण्याची बावडेकर यांनी विनंती डॉक्टरांना केली. यावरुन त्यांची अभिनयाबाबतची चिकाटी पाहायला मिळतेय. अमोल यांच्या प्रकृतीबद्दल कळल्यानंतर नाटकाच्या निर्मात्यांनी रविवारी सकाळी पावणेअकरा वाजता पार्ल्यातील दीनानाथ नाट्यगृहामध्ये होणारा प्रयोग रद्द करण्याचा निर्णय घेतला. प्रेक्षकांना नाटकाच्या तिकिटाचे पैसे परत करण्यात आले.
अमोल यांच्या जागी आता अभिनेता अनिरुद्ध जोशी ही भूमिका साकारणार आहे. लवकरच तालमी करुन नाटकाच्या पुढच्या प्रयोगात तो दिसेल, अशी माहिती दिग्दर्शक राजेश देशपांडे यांनी फेसबुक पोस्टद्वारे दिली. “कुठून कुठून येतं हे स्पिरीट? कोण देतं हे बळ? देवाच्या कृपेने आणि रसिकांच्या आशीर्वादाने अमोल आता बरा आहे, लवकरच रंगभूमीवर रुजू होईल”, असं कॅप्शन देत त्याने ही पोस्ट शेअर केली आहे.
‘महाराष्ट्र टाईम्स’शी साधलेल्या संवादात दिग्दर्शक राजेश देशपांडे म्हणाले की, “डॉक्टरांनी अमोल यांची प्रकृती तपासल्यानंतर परिस्थितीचे गांभीर्य पाहून अँजिओग्राफी करण्याचा निर्णय घेतला होता. परंतु त्याही परिस्थितीत अमोल यांनी डॉक्टरांना विनंती केली, की मला केवळ तीन तासांचा वेळ द्या. मी नाटकाचा प्रयोग पूर्ण करुन येतो. अर्थात, डॉक्टरांनी तशी परवानगी दिली नाही. प्रकृती गंभीर असताना नाटकाचा प्रयोग करण्याची तयारी दाखवली हे कौतुकास्पद आहे”.
