abhijeet chavan fake news : आजकाल सोशल मीडिया इतकं प्रबळ झालं आहे की, एखादी बातमी वाऱ्यासारखी काही क्षणात संपूर्ण जगभरात पसरते. बातमी चांगली असो वा वाईट ती पसरायला काही क्षणाचाही विलंब लागत नाही. युट्युब, फेसबुक, इंस्टाग्राम या माध्यमातून बरेचदा खोट्या बातम्या पसरवल्या जातात. बरेचदा कलाकारांच्या वा दिग्गज कलाकार मंडळींच्या निधनाच्या खोट्या बातम्याही पसरतात. काही दिवसांपूर्वीच ज्येष्ठ अभिनेते मोहन जोशी यांच्या निधनाची बातमी समोर आली. हे पाहून त्यांना स्वतःलाही धक्का बसला. शेवटी त्यांनी स्वतःच एका माध्यमाशी संपर्क साधत ही बातमी खोटी असल्याचं आणि ते ठणठणीत असल्याचं म्हटलं. यानंतर आणखी एका अभिनेत्याच्या मृत्यूची खोटी बातमी पसरवण्याचा प्रयत्न करण्यात आला आहे.
काही दिवसांपूर्वीच अभिनेत्री प्रिया मराठेच्या निधनाची बातमी समोर आली तेव्हा साऱ्यांना धक्का बसला. ही बातमी खोटी आहे की काय असं वाटलं मात्र प्रिया मराठेचे खरोखरच कर्करोगाने निधन झाल्याचे समोर आले. प्रियाच्या जाण्याने संबंध सिनेविश्वाला खूप मोठा धक्का बसला. प्रिया पाठोपाठ आणखी एका अभिनेत्याचा मृत्यू असे फसवणूक करणारे थंबनेल पाहून या मराठी अभिनेत्याने आवाज उठविला आहे. हा अभिनेता म्हणजे अभिजीत चव्हाण. अभिजीत चव्हाणला सिनेविश्वात बाबा असंही म्हणतात.
मालिका आणि चित्रपटांच्या माध्यमातून अभिजीत नेहमीच प्रेक्षकांच्या भेटीस येत असतो. मराठीसह हिंदीतही अभिजीतने महत्त्वपूर्ण भूमिका साकारल्या आहेत. आता मात्र अभिजीत स्वतःच्या मृत्यूच्या बातमीने संतापला आहे. थेट फेसबुक पोस्ट शेअर करत ‘आता काय करायचं’ असं म्हणत अभिजीतने पोस्ट लिहिली आहे. “मराठी सिनेविश्वातील दोन कलाकार गमावले”, असं म्हणत प्रिया मराठे आणि अभिजीत चव्हाणचे फोटो थंबनेलला लावले. आतील क्लिकवर अभिनेते आशिष वारंग यांची बातमी देत चुकीचा फोटो लावून दिशाभूल करण्याचा प्रयत्न या युट्युब चॅनेलमार्फत करण्यात आला.
आणखी वाचा – कुणी तरी येणार येणार गं…; लोकप्रिय मराठी अभिनेता लवकरच होणार बाबा, प्रेग्नन्सी किट दाखवत दिली गुडन्यूज
“माझ्या मृत्यूची बातमी मला पाहायला मिळाली. अजून काय पाहिजे. आता काय करायचं यांचं?”, असा सवाल अभिजीतने त्याच्या पोस्टमधून उपस्थित केला आहे. याशिवाय त्याच्या पोस्टवर असंख्य मराठी कलाकारांनी सुद्धा प्रतिक्रिया देत संताप व्यक्त केला आहे. विशाखा सुभेदारने यावर कमेंट करत, “कारवाई करा आणि तुझं आयुष्य वाढलं बाबा”, असं म्हटलं आहे.
