ज्येष्ठ अभिनेत्री सीमा देव यांच्या निधनानंतर कलाविश्वाला मोठा धक्का बसला. आता चित्रपटसृष्टीमधून आणखी एक दुःख बातमी समोर आली आहे. सुप्रसिद्ध गीतकार देव कोहली यांचं आज निधन झालं आहे. ते ८१ वर्षांचे होते. गेल्या काही महिन्यांपासून शारिरीक समस्यांमुळे अंधेरी येथील कोकिलाबेन धीरुभाई अंबानी रुग्णालयामध्ये त्यांच्यावर उपचार सुरु होते. त्यांच्यामध्ये कोणतीच सुधारणा होत नसल्याचं डॉक्टरांनी देव कोहली यांच्या कुटुंबियांना कळवलं होतं. डॉक्टरांच्या म्हणण्यानुसार त्यांना घरी आणण्यात आलं. अखेरीस त्यांची आजाराशी सुरु असलेली झुंज अपयशी ठरली.
दहा दिवसांपूर्वी देव कोहली यांना रुग्णालयामधून घरी आणण्यात आलं. पण आज सकाळी चार वाजता झोपेत असतानाच देव कोहली यांची प्राणज्योत माळवली. देव कोहली यांच्या निधनानंतर अनेक कलाकार मंडळी दुःख व्यक्त करत आहे. तसेच त्यांच्या निधनानंतर चित्रपटसृष्टीचं मोठं नुकसान झाल्याची भावना अनेक जण व्यक्त करत आहेत.
आणखी वाचा – Video : “बाबाही गेले अन्…”, आईच्या अंत्यसंस्कारानंतर अजिंक्य देवने जोडले हात, म्हणाला, “आई-बाबांनी नेहमीच…”
देव यांनी चित्रपटसृष्टीला दिलेलं योगदान अमुल्य आहे. ‘लाल पत्थर’, ‘मैंने प्यार किया’, ‘हम आपके है कौन’, ‘बाजीगर’, ‘जुडवा २’, ‘मुसाफिर’, ‘इश्क’, ‘शूट आउट अॅट लोखंडवाला’, ‘टॅक्सी नंबर ९११’ यांसारख्या १०० हून अधिक चित्रपटांसाठी त्यांनी गाणी लिहिली. इतकंच नव्हे तर सलमान खानचा सुपरहिट ठरलेला चित्रपट ‘मैंने प्यार किया’साठी त्यांनी ‘कबूतर जा जा’, ‘आजा शाम होने आई’, ‘आते-जाते हंसते गाते’, ‘कहे तोसे सजना’ गाणी लिहिली.
देव यांनी त्यांच्या संपूर्ण करिअरमध्ये राम लक्ष्मण, अन्नु मलिक, आनंद मिलिंद, आनंद राज सारख्या दिग्गज मंडळींबरोबर काम केलं आहे. लोखंडवाला येथे त्यांच्या राहत्या घरी दुपारी २ वाजता अंतिम दर्शनासाठी देव कोहली यांचं पार्थिव ठेवण्यात येणार आहे. ओशीवरा स्मशानभूमीमध्ये त्यांच्यावर अंत्यसंस्कार होणार आहेत.
