प्रत्येक कलाकाराचा खूप मोठा चाहतावर्ग हा असतो. प्रत्येक कलाकाराने त्याच्या अभिनयाच्या जोरावर हा त्याचा चाहतावर्ग निर्माण केला आहे. कलाकारावर हे चाहते निस्सीम प्रेम करतात. अशातच एका मराठमोळ्या अभिनेत्याने त्यांच्या चाहत्यांचा एक किस्सा सोशल मीडियावरुन शेअर केला आहे. हा अभिनेता म्हणजे समीर चौघुले. महाराष्ट्राची हास्यजत्रा या कार्यक्रमातून समीर चौघुले घराघरांत पोहोचले. या कार्यक्रमामुळे समीर यांनी लाखो चाहत्यांच्या दिलावर राज्य केलं. चाहतेही समीर यांच्यासाठी वेडे असलेले पाहायला मिळाले. (Samir Choughule Fan Moment)
चाहत्यांच्या प्रेमापोटी समीर यांनी एक पोस्ट शेअर करत साऱ्यांचं लक्ष वेधून घेतलं आहे. चाहत्याने काढलेला समीर यांच्या फोटोफ्रेमबरोबरचा एक फोटो पोस्ट करत त्यांनी लिहिलं आहे की, “हे असे चाहते आहेत म्हणून जगण्याला अर्थ आहे. लहानपणी माझ्या घराच्या भिंतीवर मी माझ्या आवडत्या हिरोंचे फोटो लावायचो. अमिताभ बच्चन, ब्रूस ली, जॅकी चॅन, पु.ल देशपांडे, चार्ली चॅप्लिन (द कीड), कपिल देव यांचा (८३ चा वर्ल्डकप उचललेला) असे अनेक फोटो माझ्या घराच्या भिंतीवर, गद्रेच्या लोखंडी कपाटावर असायचे. तेव्हा खरंच वाटलं नव्हतं कोणी माझा फोटो आपल्या घराच्या भिंतीवर लावेल” असं ते म्हणाले.
यापुढे त्यांनी लिहिलं आहे की, “निखिल माने या माझ्या चाहत्याने माझ्या प्रेमापोटी माझे चित्र (हस्त व हसत चित्र) आपल्या घरातील भिंतीवर लावले आहे. माझ्यासाठी ही अत्यंत आनंदाची बाब आहे. स्ट्रेस व नैराश्याने भरलेल्या जीवनात आपण नकळतपणे अनेकांच्या मनाला उभारी, ऊर्जा, आनंद मिळण्याचे निमित्त ठरतो. ही गोष्ट कधी कधी गहिवरून टाकते. चाहत्यांचे प्रेम गुदमरवून टाकतं. हास्याची ताकद किती मोठी आहे याची प्रचिती देणारी असंख्य उदाहरणे आम्ही हास्यजत्रेकरी रोज अनुभवतो. हे असे चाहते आणि त्यांचे प्रेम आमची कामाप्रतीची जबाबदारी वाढवतात आणि विनोदाकडे जास्त गांभीर्याने पाहायला लावतात” असं म्हणत चाहत्यांच्या प्रेमाबद्दल भाष्य केलं.
पुढे ते म्हणाले आहेत की, “प्रत्येक प्रहसनात ५०० टक्के योगदान द्यायची उर्मी निर्माण करतात. प्रत्येक प्रयत्न सफल होतोच असं नाही. कधी उन्नीस बीस होतं पण १०० टक्के प्रयत्न आणि मेहनत करण्यात आम्ही कधीच तडजोड करत नाही. हे संपूर्ण श्रेय आमच्या हास्यजत्रेच्या कुटुंबाचे आहे. आमच्या सचिन मोटे व सचिन गोस्वामी सरांचे आहे. तसेच ‘सोनी मराठी’ या वाहिनीचे आहे. मी श्री. निखिल माने यांचे मनापासून आभार मानतो. खूप खूप प्रेम” असं म्हणत त्यांनी त्याच्या या चाहत्यांचे आभार मानले आहेत.
