छोट्या पडद्यावरील ‘महाराष्ट्राची हास्यजत्रा’ या लोकप्रिय शोमधून सर्वांना पोट धरून हसवणारे हरहुन्नरी अभिनेते म्हणून समीर चौघुले यांची लोकप्रियता आहे. त्यांच्या विनोदी अभिनयाने त्यांनी प्रेक्षकांच्या मनात त्यांचं एक वेगळंच स्थान निर्माण केलं आहे. या कार्यक्रमाला आतापर्यंत अनेक दिवस झाले असूनही या शोची व या शोमधील कलाकारांची लोकप्रियता व प्रसिद्धी दिवसेंदिवस वाढत आहे. या शोची लहानापासून ते अगदी वयोवृद्धापर्यंत प्रत्येकाच्या मनात प्रचंड क्रेझ असल्याचे पाहायला मिळत आहे आणि ही क्रेझ दिवसेंदिवस वाढतच चालली आहे.
‘महाराष्ट्राची हास्यजत्रा’ या शोमधील त्यांच्या प्रत्येक स्किट्सची चाहते आतुरतेने वाट पाहत असतात. अशातच समीर चौघुले त्यांच्या चाहत्यांसाठी एक नवीन कार्यक्रम घेऊन येत आहेत. ‘महाराष्ट्राची हास्यजत्रा’मधून हसवणारे समीर चौघुले आता त्यांच्या आणखी एका कार्यक्रमातून प्रेक्षकांना हसवायला सज्ज झाले आहेत. समीर चौघुले त्यांचा एक नवाकोरा कार्यक्रम घेऊन येत असून या कार्यक्रमाद्वारे दीड तास धमाल किस्से, गप्पा मनोरंजन होणार आहे. यासंदर्भात समीर चौघुलेंनी नुकतीच इन्स्टाग्रामवर पोस्ट शेअर केली आहे.
या पोस्टमध्ये त्यांनी असं म्हटलं आहे की, “‘सम्या सम्या मैफिलीत माझ्या’ समीर चौघुले. प्रेम हे ट्रेनमध्ये चढताना हुकलेल्या संधीसारखं असत, जे संधीच सोनं करतात त्याना संसाराची विंडोसीट मिळते. तर काही जणांच्या मते, प्रेम हे प्राजक्ताच्या सड्यासारखं असत जे नेहेमी पायदळी तुडवलं जातं. तर काही जणांच्या मते खरं प्रेम म्हणजे ‘एखाद जुनं पुस्तक चाळताना सापडलेलं मोराचं पीस” लग्न म्हणजे काय यावर कोणीतरी म्हटलं आहे “साबणाची संपत आलेली जुनी वडी नव्या कोऱ्या साबणाला चिकटवणे आणि साबण मोठा करून पुढील अंघोळ करणे”. काही जणांच्या मते लग्न म्हणजे “मुंडावळ्या बांधून वाजत गाजत संसाराच्या बाईकवर बसून ‘मौत का कुव्वा’ मध्ये उडी मारणे” वगैरे वगैरे.”
यापुढे त्यांनी या पोस्टमध्ये असं म्हटलं आहे की, “आयुष्यात सुखी होण्यासाठी गुदगुल्या करणाऱ्या, मजेशीर, हास्यकल्लोळ उसळवणाऱ्या महत्वाच्या टिप्स घेऊन येतायत सदाबहार युनिव्हर्सिटीचे प्राध्यापक आणि सुप्रसिद्ध अभिनेता लेखक समीर चौघुले. एक नवा कोराकरकरीत एकपात्री कथाकथनाचा कार्यक्रम घेऊन ‘सम्या सम्या मैफिलीत माझ्या’ हसतखेळत गुदगुल्या करत आपल्याला आपलाच आरसा दाखवणाऱ्या धम्माल विनोदांची भेळ म्हणजेचं ‘सम्या सम्या मैफिलीत माझ्या’ सम्याच्या मैफिलीत तुमचं स्वागत आहे”.
दरम्यान, समीर चौघुलेंच्या या पोस्टला त्यांच्या अनेक चाहत्यांनी लाईक्स व कमेंट्स करत प्रतिसाद दिला आहे. तसेच अनेकांनी त्यांच्या या नवीन सुरुवातीसाठी त्यांना शुभेच्छाही दिल्या आहेत. त्याचबरोबर प्रसाद ओक, स्पृहा जोशी, अभिजीत खांडकेकर, शिवाली परब, वनिता खरात, नम्रता संभेराव आदी कलाकारांनीही समीर चौघुले यांना शुभेच्छा दिल्या आहेत.
