मराठी चित्रपटांना थिएटर मिळत नाहीत हा मुद्दा गेली कित्येक वर्ष जैसे थे आहे. प्रेक्षकांना चित्रपट बघण्याची इच्छा असली तरी काही ठिकाणी मराठी चित्रपटांना शो मिळत नसल्याची बाबही आजपर्यंत समोर आली आहे. आता हा मुद्दा पुन्हा एकदा चर्चेत आला आहे. मराठी चित्रपटांना थिएटर मिळत नसल्याची खंत अभिनेता प्रसाद खांडेकरने व्यक्त केली होती. त्याचा हाच मुद्दा विधान परिषदेचे सभागृह नेते प्रवीण दरेकरांनी विधान परिषदेत मांडला आहे. दरम्यान राज्याचे उपमुख्यमंत्री देवेंद्र फडणवीस यांनीही याबाबत भाष्य केलं आहे. (Devendra Fadnavis On Marathi Movie )
प्रसादचा ‘एकदा येऊन तर बघा’ चित्रपट ८ डिसेंबरला सर्वत्र प्रदर्शित होत आहे. या चित्रपटाला अधिकाधिक शो मिळावे म्हणून तो सध्या प्रयत्न करत आहे. याचबाबत प्रवीण दरेकरांनी विधान परिषदेत म्हटलं की, “अध्यक्ष महोदय, बोरीवलीमधील प्रसाद खांडेकर हा एक अभिनेता आहे. ‘महाराष्ट्राची हास्यजत्रा’ कार्यक्रमामधून तो लोकप्रिय झाला. त्याचा ८ डिसेंबरला ‘एकदा येऊन तर बघा’ हा मराठी चित्रपट येत आहे. पण सिनेमामधील काही बॉस, दाद लोक आहेत ते मराठी चित्रपटांना थिएटर मिळवून देत नाहीत”.
आणखी वाचा – लग्नानंतर पियुष-सुरुची यांच्या रिसेप्शन सोहळ्याचे फोटो व्हायरल, डिझायनर गाऊनमध्ये दिसली नवी नवरी
यापुढे त्यांनी विनंती केली की, “प्रसाद खांडेकर हा मराठी तरुण सर्वसामान्य कुटुंबातील मुलगा आहे. त्याच्या चित्रपटाला थिएटर मिळायला पाहिजे यासाठी माननीय मुख्यमंत्री व उपमुख्यमंत्र्यांनी सहकार्य करावे ही माझी विनंती आहे”. प्रवीण दरेकरांनी आपलं मत मांडल्यानंतर उपमुख्यमंत्री देवेंद्र फडणवीस यांनीही या मुद्द्यावर भाष्य करत एक आश्वासन दिलं.
देवेंद्र फडणवीस याबाबत म्हणाले की, “प्रसाद खांडेकर अतिशय गुणी कलाकार आहे. ‘महाराष्ट्राची हास्यजत्रा’मधून गेले काही वर्ष प्रेक्षकांच्या मनावर त्यांनी अधिराज्य गाजवलं आहे. जर मराठी चित्रपटांना थिएटर मिळत नसतील तर गरजेनुसार कारवाईही करण्यात येईल. पण थिएटर उपलब्ध करुन देण्यात येतील”. आता या आश्वासनानंतर ‘एकदा येऊन तर बघा’ चित्रपटाला कितपत थिएटर मिळतात, तसेच मराठी चित्रपटांना थिएटर न मिळणं यावर कायमचा तोडगा निघणार का? हे पाहावं लागेल.