Lakshmichya Pavalanni Famous Actor Wedding : मराठी कलाविश्वात सध्या लग्नसोहळ्यांची धामधूम पाहायला मिळत आहे. गेल्या काही दिवसांत अनेक लोकप्रिय कलाकारांनी आपल्या आयुष्याची नवी सुरुवात करत लग्नगाठ बांधली आहे. नुकताच ‘फ्रेशर्स’ मालिका फेम अभिनेता सिद्धार्थ खिरीड विवाहबंधनात अडकला होता. त्यानंतर आता छोट्या पडद्यावरील आणखी एका लाडक्या अभिनेत्याने चाहत्यांना सुखद धक्का दिला आहे.
अशातच स्टार प्रवाहवरील ‘लक्ष्मीच्या पाऊलांनी’ या लोकप्रिय मालिकेमधून घराघरात पोहोचलेला सोहम, म्हणजेच अभिनेता ऋत्विक तळवलकर, याने आपल्या लग्नाची गोड बातमी सोशल मीडियावर शेअर केली आहे. ऋत्विकने आपल्या सोशल मीडिया अकाउंटवर लग्नाचे खास फोटो पोस्ट करत विवाहबंधनात अडकल्याची माहिती दिली. तो सोशल मीडियावर नेहमीच सक्रिय असतो आणि आपल्या वैयक्तिक आयुष्यातील क्षण चाहत्यांशी शेअर करत असतो. काही दिवसांपूर्वी त्याने प्री-वेडिंग फोटोशूटचे फोटो पोस्ट केले होते. त्यानंतर बॅचलर पार्टीचे फोटोही त्याने चाहत्यांसोबत शेअर केले होते. अखेर आता ऋत्विकने लग्नगाठ बांधली आहे. (Lakshmichya Pavalanni Famous Actor Wedding)
गेल्या वर्षी जुलै महिन्यात त्याने त्याची गर्लफ्रेंड अनुष्का चंदक हिला प्रपोज करत तो खास क्षण सोशल मीडियावर शेअर केला होता. त्यानंतर आता या दोघांचा थाटामाटात विवाहसोहळा पार पडला आहे. २५ जानेवारी रोजी ऋत्विक आणि अनुष्काने शाही पद्धतीने एकमेकांसोबत सात फेरे घेतले. लग्नाच्या फोटोंमध्ये ऋत्विकने ऑफ-व्हाईट रंगाची शेरवानी परिधान केली असून, अनुष्काने पेस्टल रंगाची सुंदर साडी नेसली आहे. दोघांच्याही चेहऱ्यावरचा आनंद लग्नाच्या फोटोंमधून स्पष्टपणे दिसत असून, हे फोटो सध्या सोशल मीडियावर चांगलेच व्हायरल होत आहेत. (Lakshmichya Pavalanni Famous Actor Wedding)
