‘सारेगमप लिटल चॅम्प्स’ या लोकप्रिय रिऍलिटी शोमधून गायिका कार्तिकी गायकवाड घराघरांत पोहोचली. कार्तिकीने आजवर तिच्या गायनशैलीने रसिक प्रेक्षकांची मन जिंकली आहेत. जगभरात कार्तिकीचे बरेच चाहते आहेत. सोशल मीडियावरही कार्तिकी बऱ्यापैकी सक्रिय असते. बरेचदा गायिका तिच्या व्यावसायिक आयुष्याबरोबरच वैयक्तिक आयुष्यामुळे चर्चेत असते. अशातच आता कार्तिकी तिच्या खासगी आयुष्यामुळे चर्चेत आली आहे. कार्तिकी लवकरच चाहत्यांना गुडन्यूज देणार आहे. कार्तिकीच्या समोर आलेल्या व्हिडीओने साऱ्यांचं लक्ष वेधून घेतलं आहे. (Kartiki Gaikwad Lovestory)
कार्तिकी व रोनित लवकरच आई-बाबा होणार आहेत. कार्तिकीच्या डोहाळ जेवणातील एक व्हिडीओ सध्या सोशल मीडियावर तुफान व्हायरल होताना पाहायला मिळत आहे. अगदी राजेशाही थाटामाटात कार्तिकीचा हा डोहाळ जेवणाचा कार्यक्रम पार पडला आहे. लग्नाच्या चार वर्षांनी कार्तिकी आई होणार आहे. ही कार्तिकीने दिलेली आनंदाची बातमी साऱ्यांचं लक्ष वेधून घेत आहे. कार्तिकीने २०२०मध्ये रोनित पिसेसह लग्नगाठ बांधली.
‘टाइम्स ऑफ इंडिया’ला दिलेल्या मुलाखतीत कार्तिकीने तिच्या लग्नाबाबत भाष्य केलं होतं. तेव्हा कार्तिकी म्हणाली, “आम्ही डिसेंबरमध्ये लग्न करायचे ठरवले होते. जेणेकरुन कोरोनाच प्रमाण कमी होईल किंवा किमान नियंत्रणात येईल. मात्र सध्याच्या परिस्थितीमुळे आम्हाला सावध राहावे लागले. शिवाय, आमची लग्नाची तारीख पुढे ढकलण्याचा आमचा हेतूही नव्हता. त्यामुळे आम्ही सर्व प्री-फंक्शन्स हे सामाजिक अंतराचे नियम काटेकोरपणे पाळले जातील याची आम्ही खात्री करून घेत लग्नसोहळा उरकला”.
गायिका पुढे म्हणाली, “आमचा विवाह घरच्यांनी जुळवून आणला आहे. आमच्या घरीच आम्ही आमच्या संबंधित कुटुंबांद्वारे भेटलो. रोनित एक अद्भुत व्यक्ती आहे आणि तो पूर्णपणे वेगळ्या क्षेत्रात कार्यरत आहे.” यावरुन कार्तिकी व रोनित यांचं अरेंज मॅरेज असल्याचं कळतंय. सध्या दोघांचा सुखाचा संसार सुरु असून कार्तिकी व रोनित लवकरच चिमुकल्या पाहुण्याच्या आगमनाची तयारी करताना दिसत आहेत.
कार्तिकीच्या लग्नाबाबत मुग्धा, प्रथमेश व आर्या यांना जेव्हा कळलं तेव्हा त्यांनाही आश्चर्याचा धक्का बसला. होम मिनिस्टर कार्यक्रमात कार्तिकी व रोनित यांनी हजेरी लावली होती तेव्हा त्यांच्या मित्र परिवारालाही आमंत्रित करण्यात आलं होत. यावेळी कार्तिकीच्या लग्नाबाबत बोलताना मुग्धा म्हणाली, “तिने जेव्हा मला फोन करुन सांगितलं तेव्हा मला धक्काच बसला. याआधी कधी आम्ही लग्नाबाबत बोलायचो तेव्हा तिचं एकटीच असं म्हणणं असायचं की आम्ही कधीच लग्न करणार नाही. फोन आल्यावर मला आधी तेच आठवलं की, ही लग्न करणार नव्हती”.
