KGF 2 Co-Director Kirtan Nadagouda news : कन्नड चित्रपटसृष्टीतील सुपरहिट ‘केजीएफ’ चित्रपट जागतिक स्तरावर पोहोचलेला आहे. आता हा चित्रपट एका दुखद घटनेमुळे पुन्हा चर्चेत आला आहे. ‘केजीएफ चॅप्टर २’ या चित्रपटाचे सह-दिग्दर्शक किर्तन नाडागौडा यांच्या कुटुंबावर दु:खाचा डोंगर कोसळला असून, त्यांच्या साडेचार वर्षांच्या मुलाचा दुर्दैवी अपघातात मृत्यू झाल्याची माहिती समोर आली आहे.
माध्यमांच्या मिळालेल्या माहितीनुसार, किर्तन नाडागौडा आणि त्यांच्या पत्नी समृद्धी पटेल यांचा मुलगा सोनार्श के. नाडागौडा याचा लिफ्टमध्ये अडकून दुर्दैवी मृत्यू झाला. हा अपघात इतका अचानक आणि वेगात घडला की, कुटुंबीयांना त्याला वाचवण्याची कोणतीही संधी मिळू शकली नाही. अवघ्या काही क्षणांत घडलेल्या या घटनेने संपूर्ण कुटुंब हादरून गेलं आहे.
‘कन्नड प्रभा’ या वृत्तपत्राने दिलेल्या वृत्तानुसार, सोनार्श अत्यंत सर्वांचा लाडका मुलगा होता. त्याच्या अचानक जाण्याने नाडागौडा कुटुंबावर खूप मोठा दुःखाचा डोंगर कोसळला आहे. ही दु:खद बातमी कळताच कन्नड चित्रपटसृष्टीसह संपूर्ण दाक्षिणात्य सिनेसृष्टीत शोककळा पसरली आहे. अनेक अभिनेते, दिग्दर्शक, तसेच राजकीय क्षेत्रातील मान्यवरांनी सोशल मीडियाच्या माध्यमातून आपल्या भावना व्यक्त केल्या आहेत. शोकसंदेश देत अनेकांनी नाडागौडा कुटुंबीयांना धीर देण्याचा प्रयत्न केला आहे. ‘केजीएफ’सारख्या भव्य यशस्वी चित्रपटाशी जोडलेल्या कुटुंबावर आलेल्या या दु:खद घटनेमुळे सिनेसृष्टी हादरून गेली असून, एका जीवाच्या जाण्याने सर्वत्र हळहळ व्यक्त केली जात आहे.
