गेले वर्ष हे मनोरंजनाच्या दृष्टीने अनेकदृष्ट्या संपन्न होते. ओटीटीवर रहस्य, कॉमेडी, प्रेम, अॅक्शनने परिपूर्ण असलेल्या अनेक वेबसीरिज व चित्रपट पाहायला मिळाले होते. अशातच येत्या नवीन वर्षातदेखील ओटीटीवर अनेक वेबसीरिज प्रदर्शित होणार आहेत. यात रोहित शेट्टी दिग्दर्शित ‘इंडियन पोलिस फोर्स’ या सीरिजपासून ते अगदी मनोज बाजपेयी यांच्या ‘किलर सूप’ या सीरिजचादेखील समावेश असणार आहे. जर तुम्हाला ओटीटीवर मर्डर मिस्ट्री, थ्रिलर त्याचबरोबर अॅक्शन अनुभवायची असेल तर या खास सीरिज तुमच्या मनोरंजनासाठी सज्ज आहेत.
(१) किलर सूप : मनोज बाजपेयी व कोंकणा सेन शर्मा यांची प्रमुख भूमिका असलेली क्राइम थ्रिलर वेबसिरीज ‘किलर सूप’ येत्या ११ जानेवारीला प्रदर्शित होणार आहे. या वेबसिरीजची कथा प्रभाकर (मनोज बाजपेयी) आणि स्वाती (कोंकणा सेन शर्मा) यांची असल्याचे बोलले जात आहे. उमेश आणि स्वाती यांचे एकमेकांवर प्रेम आहे. स्वातीचे शेफ बनण्याचे स्वप्न आहे. पण एका हत्येनंतर यांचे आयुष्यच बदलून जाते. अभिषेक चौबे दिग्दर्शित ही वेबसीरिज नेटफ्लिक्स या ओटीटी प्लॅटफॉर्मवर प्रदर्शित होणार आहे.
(२) कर्मा कॉलिंग : डिस्नी प्लस हॉटस्टारवर प्रदर्शित होणारी ‘कर्मा कॉलिंग’ ही वेबसीरिज ‘रिव्हेंज’ या एबीसी सीरिजचा रिमेक आहे. या वेबसीरिजमध्ये रवीना टंडन ही चकचकीत, ग्लॅमर, फसवणूक व विश्वासघाती अशा अलिबागवर राज्य करणारी इंद्राणी कोठारीची भूमिका साकारणार आहे. रुची नारायण यांनी यांनी या सीरिजचे दिग्दर्शन केले असून येत्या २६ जानेवारीला ही सीरिज प्रदर्शित होणार आहे.
(३) द लीजेंड ऑफ हनुमान सीझन ३ : ‘द लीजेंड ऑफ हनुमान’ चा तिसरा सीझन हा येत्या १२ जानेवारी रोजी डिस्नी प्लस हॉटस्टारवर प्रदर्शित होणार आहे. या वेबसीरिजमध्ये रावणाच्या पात्राला मराठमोळा अभिनेता शरद केळकरचा आवाज लाभला आहे. या मालिकेच्या कथेबद्दल सांगायचे तर, या मालिकेची कथा पौराणिक वानरसेना व भगवान हनुमान यांच्याभोवती फिरते.
(४) इंडियन पोलिस फोर्स : रोहित शेट्टी व सुशांत प्रकाश दिग्दर्शित ‘इंडियन पोलिस फोर्स’ ही सीरिज येत्या १९ जानेवारी २०२४ रोजी अॅमेझोन या ओटीटी प्लॅटफॉर्मवर प्रदर्शित होणार आहे. या अॅक्शन थ्रिलर वेबसीरिजची कथा भारतीय पोलिस अधिकाऱ्यांभोवती फिरणारी आहे. अॅमेझॉन प्राइम व्हिडिओवर येणाऱ्या या वेबसीरिजमध्ये सिद्धार्थ मल्होत्रा, शिल्पा शेट्टी व विवेक ओबेरॉय हे कलाकार मुख्य भूमिकेत दिसणार आहेत. याशिवाय या मालिकेत श्वेता तिवारी, निकितिन धीर, ऋतुराज सिंग, मुकेश ऋषी व ललित परिमू यांच्याही महत्त्वाच्या भूमिका आहेत.
