अभिनेत्री सोनाक्षी सिन्हा व झहीर इक्बाल यांच्या लग्नाची धामधुम सिनेसृष्टीत पाहायला मिळाली. अगदी थाटामाटात या दोघांचा विवाहसोहळा २३ जून रोजी पार पडला. दोघांच्या नात्याला सात वर्ष पूर्ण होताच या जोडीने लग्न करण्याचा निर्णय घेतला. नोंदणी पद्धतीने सोनाक्षी व झहीर यांचं लग्न झालं. त्यानंतर दोघांचा शाही रिसेप्शन सोहळा पार पडला. यावेळी सिनेसृष्टीतील काही कलाकार मंडळी उपस्थित होते. सोनाक्षी सिन्हाच्या जिवलग मैत्रिणींपैकी एक हुमा कुरेशीनेही मैत्रिणीच्या रिसेप्शन पार्टीला हजेरी लावली होती. (Huma Qureshi Dating Rumour)
या पार्टीत हुमा कुरेशी तिचा बॉयफ्रेंड रचित सिंहबरोबर पोहोचली होती. या प्रसंगातील अनेक फोटोंमध्ये दोघेही एकत्र दिसत आहेत. त्यामुळे आता अशी चर्चा आहे की, सोनाक्षीनंतर पुढची जोडी हुमा कुरेशी आणि रचित सिंह असणार आहे. हुमा व रचितच्या डेटिंगच्या बातम्या अनेक दिवसांपासून कानावर पडत होत्या. सोनाक्षीच्या लग्नाच्या या फोटोंमध्ये रचितबरोबर हुमा कुरेशीला पाहून त्यांच्या प्रेमकथेची चर्चा सुरु झाली आहे. दोघांनीही याबाबत काहीही दुजोरा दिला नसला तरी आता त्यांच्या लग्नाच्या बातम्या येऊ लागल्या आहेत.
हुमा कुरेशीला सगळेच आधीपासून ओळखतात पण रचितबद्दल फार कमी जणांना ठाऊक असेल. तो एक प्रसिद्ध अभिनय प्रशिक्षक आणि महत्त्वाकांक्षी अभिनेता आहे. आलिया भट्ट, रणवीर सिंग, वरुण धवन, विकी कौशल, अनुष्का शर्मा यांसारख्या अनेक कलाकारांबरोबर त्याने अभिनय प्रशिक्षक म्हणूनही काम केल्याचे बोलले जाते. रचित रवीना टंडनच्या ‘कर्मा कॉलिंग’ या वेबसीरिजमध्येही दिसला आहे. ज्यामध्ये त्याने वेदांतची भूमिका साकारली होती.
रचितच्या आधी हुमाने दिग्दर्शक व पटकथा लेखक मुद्दसर अजीजला डेट केले होते. मात्र, अनेक वर्षांपूर्वी दोघे वेगळे झाले. सुमारे तीन वर्षे डेट केल्यानंतर हुमा आणि मुद्दसर यांचे ऑक्टोबर २०२२ मध्ये ब्रेकअप झाल्याचे वृत्त आहे.