बॉलीवूडच्या सदाबहार अभिनेत्रींपैकी एक असलेल्या रेखा यांना ओळखीची गरज नाही. बालपणात अनेक अडचणींचा सामना करणाऱ्या रेखा यांना अगदी लहान वयातच अभिनयाच्या जगात प्रवेश करावा लागला. त्यांना कधीच नायिका बनायचे नव्हते, पण परिस्थिती आणि मजबुरीने त्यांना अभिनयात यायला भाग पाडले. रेखा यांनी चित्रपटांमध्ये येत लाखो लोकांच्या हृदयावर राज्य केले. आजही रेखा यांचे लाखो चाहते आहेत. वयाच्या ६९ व्या वर्षी त्या आजच्या अभिनेत्रींना सौंदर्याच्या बाबतीत मागे टाकतात हे ही तितकेच खरे. रेखा यांचे खरे नाव भानुरेखा गणेशन आहे. पण त्यांना रेखा म्हणूनच ओळखले जाते. एका वर्षाच्या असताना त्यांनी ‘इंटी गुट्टू’ या तेलगू चित्रपटात काम केले. रेखा यांनी त्यांच्या कारकिर्दीत १८० हून अधिक चित्रपटांमध्ये काम केले आणि राष्ट्रीय पुरस्कार व पद्मश्री पुरस्कारासह इतर अनेक पुरस्कार जिंकले. रेखा गेल्या १० वर्षांपासून सिनेजगतापासून दूर आहेत. असं असलं तरी अनेक कार्यक्रमांमध्ये त्या स्पॉट होताना दिसतात. (Rekha Income)
जर ही अभिनेत्री इतकी वर्षे अभिनयापासून दूर आहे, तर त्यांचे उत्पन्न कुठून येते?, त्या त्यांचा घरखर्च कसा भागवतात असा प्रश्न अनेकांना पडला आहे. रेखा यांच्याकडे मुंबईमध्ये दक्षिण भारतात अनेक मालमत्ता आहेत. यातील काही भाग त्यांनी भाड्याने दिले आहेत. या भाड्याने महिन्याला त्या लाखो रुपये कमावतात. रेखा या मुंबईतील बँडस्टँड परिसरात राहतात. त्यांच्या घराजवळच एका बाजूला शाहरुख खानचा ‘मन्नत’ बंगला आहे आणि दुसऱ्या बाजूला सलमानचा गॅलेक्सी अपार्टमेंट आहे. रेखा यांच्या बंगल्याची किंमत सुमारे १०० कोटी रुपये असून त्याचे नाव ‘बसेरा’ आहे.
रेखा या ब्रँड एंडोर्समेंटमधूनही चांगली कमाई करतात. वेळोवेळी काही टीव्ही मालिकांचे प्रमोशन व जाहिराती करातात तिथून त्यांना चांगले मानधन मिळते. रिपोर्ट्सनुसार, होर्डिंगवर त्यांचा फोटो वापरला तर रेखाला त्यासाठी १०-२० लाख रुपये मिळतात. ‘मसाला डॉट कॉम’च्या वृत्तानुसार रेखा यांनी सांगितले होते की, त्यांच्याकडे काही रक्कम मुदत ठेवी स्वरूपात आहेत. करिअरच्या शिखरावर असताना त्यांने मिळालेले पैसे वाया घालवण्याऐवजी आपली कमाई वाचवली आणि ती एफडीमध्ये गुंतवली. त्यांनी आपल्या कमाईतील बहुतांश रक्कम बँकेच्या ठेवींमध्ये गुंतवली.
रेखा या कधीही लेटेस्ट डिझायनर कपडे घालत नाहीत किंवा कपड्यांवर पैसे खर्च करत नाहीत. खरं तर, ज्या वेगवेगळ्या सिल्कच्या साड्यांमध्ये दिसतात त्या त्यांना बहुतेक भेटवस्तू म्हणून मिळाल्या आहेत. त्यांची किंमत लाखात आहे. रेखा आपल्याबरोबर स्टाफची मोठी टीमही ठेवत नाही. त्या अनावश्यक खर्च टाळतात आणि बचत करतात. रेखा खासदार व राज्यसभेच्या सदस्य असताना त्यांना दरवर्षी ६५ लाख रुपये पगार मिळत असे. याशिवाय रेखा कोणत्याही खासगी कार्यक्रमाला किंवा समारंभाला गेल्यास त्यासाठीही त्यांना लाखो रुपये मिळतात.
