सुप्रसिद्ध मराठमोळा अभिनेता शशांक केतकर याने त्याच्या अनेक मालिकांमधून प्रेक्षकांच्या मनावर अधिराज्य गाजवले आहे. ‘होणार सून मी या घरची’ या मालिकेतील श्री या पात्रामुळे शशांकला खऱ्या अर्थानं लोकप्रियता मिळाली. सध्या शशांक ‘मुरांबा’ या मालिकेत महत्त्वपूर्ण भूमिकेत पाहायला मिळत आहे. याशिवाय शशांक मराठीसह हिंदी सिनेसृष्टीतही सक्रिय आहे. काही दिवसांपूर्वी त्यांने शेअर केलेल्या इन्स्टाग्राम अकाऊंटवरील एका पोस्टने साऱ्यांचे लक्ष वेधून घेतलं. (Shashank Ketkar Post)
करण जोहरच्या ‘शो टाईम’ या आगामी प्रोजेक्टमध्ये शशांक महत्वपूर्ण भूमिकेत दिसणार असल्याचं त्याने या पोस्टद्वारे सांगितलं. सोशल मीडियावर ही शशांक बऱ्यापैकी सक्रिय असतो. नेहमीच कोणत्या ना कोणत्या विविध सामाजिक मुद्द्यांवर व वैयक्तिक गोष्टींबाबत तो भाष्य करत प्रेक्षकांना अपडेट देत असतो. बरेचदा सामाजिक मुद्द्यांवर भाष्य केल्याने अभिनेत्याला टोलही केले गेलं आहे. मात्र या ट्रोलिंगला न जुमानता शशांक नेटकऱ्यांना सडेतोड उत्तर देतानाही दिसला आहे.
अशातच शशांकने शेअर केलेल्या एका पोस्टने साऱ्यांचे लक्ष वेधून घेतले आहे. शूटिंगच्या व्यस्त शेड्युलमधून वेळात वेळ काढत सुट्टीच्या दिवशी शशांक ठाण्यात फेरफटका घेत असल्याची ही पोस्ट त्यांने शेअर केली आहे. काही वर्षांपूर्वीच शशांक त्याची मैत्रीण प्रियंका ढवळेसह लग्न बंधनात अडकला. दोघांना आता एक मुलगा देखील आहे. प्रियंका व शशांक एकमेकांबरोबरचे अनेक रील व्हिडीओ सोशल मीडियावरुन शेअर करत असतात. अशातच शशांक प्रियांकासह ठाण्यातील रस्त्यांवर फेरफटका मारायला गेला असल्याचं त्यांने या पोस्टमधून सांगितले आहे. ही पोस्ट शेअर करत त्यानं या ठाण्यातील बऱ्याचशा गोष्टींच्या आठवणींना उजाळा दिलेला पाहायला मिळत आहे.
शशांकने सोशल मीडियाच्या इंस्टाग्राम अकाऊंटवरुन शेअर केलेल्या व्हिडीओमध्ये तो त्याच्या सुट्टीचा आनंद घालवताना दिसत आहे. या पोस्ट खाली कॅप्शन देत त्यांने असं म्हटलं आहे की, “कधी कधी आपण आपल्याच शहरात फिरायचं विसरतो. काल सुट्टी मिळाली. ठरवून मी व प्रियांका अगदी ऋग्वेदच्या वयाचे होऊन आमच्या ठाण्यात फिरलो. मी इयत्ता दहावीपर्यंत ठाण्यात होतो. शाळेत असताना मित्रांबरोबर तलावपाळीला यायचो. राम मारुती रोडवर फिरायचो, भेळ खायचो, मिसळ खायचो. त्यानंतर ‘होणार सून मी या घरची’ मालिकेचं अनेकदा शूटिंगही इथेच केलं. काल त्या सगळ्या आठवणींना पुन्हा एकदा उजाळा देता आला.” असं म्हणत त्याने ही पोस्ट शेअर केली आहे.