Anant Ambani-Radhika Merchant Pre Wedding in Jamnagar : सध्या सर्वत्रच उद्योगपती मुकेश अंबानी यांचा धाकटा मुलगा अनंत अंबानी व राधिका मर्चंट लग्नाची धामधूम सुरू आहे. गुजरातमधील जामनगर येथे लग्नाआधीच्या कार्यक्रमांनाही शुक्रवारपासून सुरुवात झाली. पहिल्या दिवशी हॉलिवूड गायिका रिहानाने हजेरी लावली होती. तिने तिच्या गाण्यांनी सर्वांचेच मनोरंज केले. तिच्या गाण्यांचे अनेक व्हिडीओ सोशल मीडियावर प्रचंड व्हायरल झाले. भारतात परफॉर्म करण्याची संधी मिळाल्यामुळे तिने अंबानी कुटुंबाचेही आभार मानले आणि अनंत व राधिकाला त्यांच्या लग्नासाठी शुभेच्छाही दिल्या.
पहिल्या दिवशीचा कार्यक्रम झाल्यानंतर रिहाना आपल्या संपूर्ण टीमसह मायदेशी परतली. ती गेल्यानंतरही तिची जादू कमी झालेली नाही. मायदेशी परत जात असताना जामनगर येथील एयरपोर्टवर तिने पोलिसांना व फोटोग्राफर्सना दिलेल्या वागणुकीमुळे तिचे सर्वच स्तरातून कौतुक केले जात आहे. अशातच अभिनेत्री जान्हवी कपूरने रिहानाबरोबरचा एक व्हिडीओ शेअर केला आहे. या व्हिडीओने सर्वांचंच लक्ष वेधून घेतले आहे.
जान्हवीने तिच्या इन्स्टाग्राम अकाऊंटवरुन ती रिहानाबरोबर चक्क मराठी गाण्यावर ठेका धरतानाचा व्हिडीओ शेअर केला आहे. या व्हिडीओमध्ये, मराठीमध्ये अत्यंत गाजलेल्या ‘सैराट’ या चित्रपटातील ‘झिंगाट’ या गाण्यावर जबरदस्त डान्स करत आहेत. या दोघींच्या मागे अंबानींची होणारी सून राधिकाही थिरकताना दिसत आहे. हा व्हिडीओ शेअर करत जान्हवीने कॅप्शन दिले आहे आहे की, “धीस वुमन इज अ गॉडेस्,स्टॉप इट गुडबाय”. या व्हिडीओमध्ये डान्स करताना रिहानाही मजा करताना दिसत आहे.
अनंत व राधिकाच्या लग्नाआधीच्या कार्यक्रमासाठी अनेक सेलिब्रिटींनी हजेरी लावली. यामध्ये अभिनेता अमिताभ बच्चन, शाहरुख खान, आमिर खान, सलमान खान, अक्षय कुमार, अजय देवगन, विकी कौशल, कतरिना कैफ, काजोल, सैफ अली खान, करीना कपूर खान, रणवीर सिंह, दीपिका पदुकोण, अर्जुन कपूर,रणबीर कपूर, आलिया भट्ट, करण जोहर आदी मंडळी उपस्थित राहिली आहेत.