‘जुळून येती रेशीमगाठी’, ‘नकटीच्या लग्नाला यायचं हं’ यांसारख्या मराठी मालिकांमध्ये प्राजक्ता माळीने उत्तम काम केलं. ती इथवरच थांबली नाही. तिने चित्रपट, वेबसीरिजमध्येही विविध भूमिका साकारल्या. शिवाय ‘महाराष्ट्राची हास्यजत्रा’ या सुपरहिट शोच्या सुत्रसंचालनाची धुराही ती सांभाळते. कलाक्षेत्रामध्ये प्राजक्ता आता यशाच्या शिखरावर आहे. पण त्याचबरोबरीने व्यावसायिक क्षेत्रातही सध्या ती तिचं नशीब आजमावत आहे. आज प्राजक्ताचा वाढदिवस आहे. याचनिमित्त प्राजक्ता राहत असलेलं घर आतून नेमकं कसं आहे? हे आपण पाहणार आहोत.
प्राजक्ताने पुण्यामध्ये स्वतःचं घर खरेदी केलं. तिचे कुटुंबीय पुण्यामध्ये राहतात. प्राजक्ता मात्र कामानिमित्त मुंबईमध्ये असते. तिचं आणखी एक स्वप्न पूर्ण झालं हे. काही दिवसांपूर्वीच प्राजक्ताने पोस्ट शेअर करत चाहत्यांना आनंदाची बातमी दिली. पण प्राजक्ताचं राहतं घर नेमकं कसं आहे? याबाबतचा एक व्हिडीओ मध्यंतरी व्हायरल झाला होता.
प्राजक्ताने तिचं घर अगदी सुंदर सजवलं आहे. तिच्या घराच्या हॉलमधील कोपरा तिने तिला मिळालेल्या पुरस्कारांनी सजवला आहे. घरात प्रवेश केल्यानंतर या पुरस्कारांकडे लक्ष जातं. शिवाय तिला वाचनाची प्रचंड आवड आहे. हे प्राजक्ताच्या घराचा व्हिडीओ पहिल्यानंतर लक्षात येतं. तिच्याकडे बऱ्याच पुस्तकांचा संग्रह आहे.
आणखी वाचा – चहाचं वेड, फिटनेसही हवा म्हणून प्राजक्ता माळी नेमकं काय करते?, म्हणाली, “मी चहाप्रेमी आहे पण…”
घराच्या हॉलला लागूनच स्वयंपाक घर आहे. तिचं स्वयंपाक घर छोटं असलं तरी अगदी सुंदर आहे. तिने स्वयंपाक घराला लागूनच जेवणाचा टेबल तयार करुन घेतला आहे. ती या टेबलवर बसून तिच्या कामाचं प्लॅनिंग करते. तसेच तिचा सकाळचा चहाही याच टेबलावर होतो. प्राजक्ताचं हे घर छोटं असलं तरी अगदी सुंदर आणि लक्ष वेधून घेणारं आहे.