गौतमी पाटील या नावाने संपूर्ण महाराष्ट्राला वेड लावलं आहे. सध्या सेलिब्रेटींच्या तुलनेत गौतमी पाटीलला प्रचंड मागणी असल्याचं दिसून येतं. सोशल मीडियासह प्रत्येक माध्यमात गौतमी पाटील ही चांगलीच व्हायरल होताना दिसते. अशातच आता ‘बिग बॉस ३’मधून नव्याने ओळख लाभलेला अभिनेता, गायक, संगीतकार डॉ. उत्कर्ष शिंदे आपल्या आगामी गाण्याच्या व्हिडीओमध्ये गौतमी पाटीलसह दिसणार आहे. त्याने आपल्या सोशल मीडिया अकाउंटवर गौतमीबरोबरचे काही खास फोटो शेअर करत चाहत्यांबरोबर ही आनंदाची बातमी शेअर केली आहे.
उत्कर्षने त्याच्या इन्स्टाग्राम अकाऊंटद्वारे गौतमीबरोबरचे काही खास फोटो शेअर केले आहेत आणि या फोटोखाली कॅप्शनमध्ये त्याने असं म्हटलं आहे की, “गौतमी पाटील आणि शिंदेशाही एका नव्या ढंगात एकत्र येणार. ‘आहो शेठ लय दिसान झालीया भेट’ या मी संगीतबद्ध केलेल्या माझ्या लावणीच्या अभुतपूर्व यशानंतर, आता मी लिहलेली, मी संगीतबद्ध केलेली “आलं बाई दाजी माझं” ही नवीन लावणी घेऊन येत आहे.”
उत्कर्षने शेअर केलेल्या या फोटोमध्ये त्याने काळ्या रंगाचा सूट परिधान केला आहे, तर गौतमीने हिरव्या रंगाची भरजरी साडी परिधान केली असल्याचे पाहायला मिळत आहे. उत्कर्षने शेअर केलेल्या या फोटोला त्याच्या व गौतमीच्या चाहत्यांनी लाईक्स व कमेंट्स करत चांगलाच प्रतिसाद दिला आहे. तसेच अनेक चाहत्यांनी या फोटोंखाली नवीन गाण्यासाठी कमेंट्सद्वारे आपली उत्सुकताही दर्शवली आहे.
त्यामुळे उत्कर्ष शिंदे व गौतमी पाटील यांच्या या नवीन गाण्याला चाहत्यांकडून कसा प्रतिसाद मिळेल उत्सुकतेचे ठरणार आहे. दरम्यान, गौतमी पाटील ही एक नृत्यांगना आहे. ती अनेकदा तिच्या बोल्ड लावणी सादरीकरणामुळे चर्चेत आली आहे. तसेच तिच्या डान्समुळे ती अनेकदा वादातही सापडली आहे. अशातच आता ती एका नवीन गाण्याद्वारे चाहत्यांच्या भेटीला येणार असल्याने तिची चांगलीच चर्चा सुरु आहे.
