Divya Shinde Post Viral : ‘बिग बॉस मराठी’ सिझन 6 च्या घरात सुरु असलेल्या सततच्या भांडणांमुळे आणि काही स्पर्धकांच्या वागणुकीमुळे शो सुरुवातीपासूनच चर्चेत आहे. अनेक वेळा ‘बिग बॉस’कडून सूचना आणि ताकीद देऊनही काही स्पर्धकांच्या वर्तनात सुधारणा न झाल्याचं स्पष्टपणे दिसून आलं. या सगळ्यात एक धक्कादायक प्रसंग घडला आणि त्यानंतर ‘बिग बॉस’ला कठोर निर्णय घ्यावा लागला. स्पर्धक दिव्या शिंदे हिने घरातील सदस्यांना थेट जीवे मारण्याची धमकी दिल्याचा प्रकार समोर आला. हा प्रकार ‘बिग बॉस’च्या नियमांचा गंभीर भंग ठरल्याने दिव्याला घराबाहेर काढलं आहे. दिव्याला सोशल मीडियावर ‘सरकार’ या नावाने ओळखलं जात होतं. मात्र तलवार चालवण्याच्या आणि हिंसाचाराच्या धमक्या राष्ट्रीय दूरचित्रवाणीवर दिल्याने ‘बिग बॉस’ने तिच्यावर थेट कारवाई केली.
घरातून बाहेर पडल्यानंतर दिव्याच्या वतीने तिच्या इंस्टाग्राम अकाउंटवरून एक स्टोरी शेअर करण्यात आली. या पोस्टमध्ये तिने चाहत्यांचे आभार मानत लवकरच सर्व गोष्टी स्पष्ट करणार असल्याचं सांगितलं आहे. “माझ्यावर प्रेम करणाऱ्या सर्व चाहत्यांचे मनापासून आभार. सध्या अनेक गोष्टी सुरू आहेत, पण काळजी करू नका. तुमच्या सर्व प्रश्नांची उत्तरं मी लवकरच देईन. मी लवकरच लाईव्ह येऊन संवाद साधेन. सत्य नक्की समोर येईल, तोपर्यंत संयम ठेवा,” असं तिच्या स्टोरीमध्ये नमूद करण्यात आलं आहे. दरम्यान, दिव्याच्या निष्कासनानंतर सोशल मीडियावर खूप प्रतिक्रिया उमटत आहेत. तिचे समर्थक “सरकार इज बॅक” अशा कमेंट्स करत तिला पाठिंबा देत आहेत. तर दुसरीकडे अनेक प्रेक्षकांनी तिच्या आक्रमक भाषेवर नाराजी व्यक्त करत बिग बॉसच्या निर्णयाचं समर्थन केलं आहे.
आणखी वाचा – ‘इश्काचा नादखुळा’ फेम अभिनेत्रीच्या घरी लगीनगाई, थाटात पार पडला मेहेंदी सोहळा, फोटो समोर
एका टास्कदरम्यान तन्वी कोल्ते हिने दिव्याचं नाव घेतल्याने वातावरण तापलं. रागाच्या भरात दिव्याने मर्यादा ओलांडत स्वतःला ‘सरकार’ म्हणत बाहेर तलवार बाळगते, आणि ती कोणावर चालवायची हे समोरच्यांच्या वागण्यावर अवलंबून असेल, असं विधान केलं. हा प्रकार गंभीर असल्याने ‘बिग बॉस’ने तिला माफी मागण्याची संधी दिली होती. मात्र दिव्या आपल्या भूमिकेवर ठाम राहिल्यामुळे अखेर ‘बिग बॉस’ने तिला शोमधून बाहेर काढण्याचा निर्णय घेतला. आता या घटनेनंतर ‘बिग बॉस मराठी’ च्या घरात पुढे काय घडणार?, आणि या वादाचा शोवर काय परिणाम होणार?, हे पाहणं महत्त्वाचं ठरणार आहे.
आणखी वाचा – “आम्ही देवाला मानत नाही” सुप्रसिद्ध बॉलिवूड अभिनेत्रीचा खुलासा; लहानपणीचा ‘तो’ अनुभव शेअर केला
