लेखक-दिग्दर्शक व अभिनेता दिग्पाल लांजेकरने आतापर्यंत छत्रपती शिवाजी महाराज व त्यांच्या मावळ्यांची शौर्यगाथा सांगणारे ‘फर्जंद’, ‘फत्तेशिकस्त’, ‘पावनखिंड’, ‘शेरशिवराज’, ‘सुभेदार’सारखे चित्रपट प्रेक्षकांच्या भेटीला आणले. छत्रपती शिवाजी महाराज आणि त्यांच्या मावळ्यांचा इतिहास चित्रपटांमधून सर्वांसमोर मांडणारे लेखक-दिग्दर्शक दिग्पालने आणखी एका ऐतिहासिक चित्रपटाची घोषणा केली आहे. काही दिवसांपूर्वी दिग्पालने सोशल मीडियाच्या माध्यमातून त्याच्या आगामी ‘शिवरायांचा छावा’ या चित्रपटाचे पोस्टर शेअर करत चाहत्यांना आनंदाची बातमी दिली होती. (Shivrayancha Chhava Teaser)
या चित्रपटाचे पोस्टर प्रदर्शित झाल्यापासून अनेकांना या चित्रपटाची उत्सुकता लागली होती. अशातच आता नुकताच या चित्रपटाचा टीझर प्रदर्शित झाला आहे. चित्रपटाचे पोस्टर प्रदर्शित झाल्यापासून या चित्रपटात छत्रपती संभाजी महाराजांची भूमिका कोण साकारणार याविषयी अनेकांना उत्सुकता लागली होती. अशातच या टीझरमधून छत्रपती संभाजी महाराजांची भूमिका साकारणाऱ्या अभिनेत्याची झलकही दिसत आहे. तसेच या टीझरमध्ये अभिनेत्याची वाघाबरोबरची साहसी दृश्येदेखील पाहायला मिळत आहे.
आणखी वाचा – ‘अ‍ॅनिमल’ नंतर नव्या भूमिकेत दिसणार रणबीर कपूर, रोहित शेट्टीबरोबर करणार काम, नवा लूक चर्चेत
‘कोण शत्रू यावरी, करील कैसा कावा, वाघालाही फाडतो, हा शिवरायांचा छावा’ असं हटके कॅप्शन देत हा टीझर सोशल मीडियावर शेअर करण्यात आला आहे. तर अभिनेता भूषण पाटील याने या चित्रपटात छत्रपती संभाजी महाराजांची भूमिका साकारली आहे. या टीझरला अनेक चाहत्यांनी लाईक्स व कमेंट्सद्वारे प्रतिसाद दिला आहे. अनेकांनी या व्हिडीओला चांगलीच पसंती दर्शवली आहे. त्याचबरोबर अनेकांनी कमेंट्समध्ये या चित्रपटासाठी उत्सुकतादेखील व्यक्त केली आहे.
ए. ए. फिल्म्स आणि एव्हरेस्ट एंटरटटेंमेंट प्रस्तुत ‘शिवरायांचा छावा’ हा चित्रपट येत्या १६ फेब्रुवारी २०२४ ला प्रेक्षकांच्या भेटीला येणार आहे. मल्हार पिक्चर्स कंपनीचे वैभव भोर, किशोर पाटकर व मधू यांनी या चित्रपटाची निर्मिती केली आहे. तर सहनिर्माते भावेश रजनीकांत पंचमतीया हे आहेत. संभाजी महाराजांच्या धगधगत्या पराक्रमाची कथा दिग्पाल लांजेकरांनी लिहिली असून पटकथा-संवाद व गाणीदेखील त्यांचीच आहेत. तसेच या गाण्यांना साजेसं संगीत संगीतकार देवदत्त मनीषा बाजी यांनी दिलं आहे आणि पार्श्वसंगीत अमर मोहिले यांचे आहे.
