Siddharth Menon Backstory : मराठी सिनेसृष्टीत स्वतःची वेगळी ओळख निर्माण करणाऱ्या अभिनेता सिद्धार्थ मेनन याने नुकत्याच एका मुलाखतीत आपल्या आयुष्यातील अत्यंत धक्कादायक अनुभव शेअर केला आहे. जन्मताच मृत घोषित करण्यात आलेल्या सिद्धार्थने आज यशस्वी अभिनय प्रवास केला आहे, त्याची ही कहाणी अनेकांसाठी प्रेरणादायी ठरत आहे. २०२५ साली प्रदर्शित झालेल्या ‘दशावतार’ या चित्रपटातून सिद्धार्थ प्रेक्षकांच्या विशेष चर्चेत आला. या सिनेमात त्याने साकारलेली माधव मेस्त्री ही भूमिका प्रेक्षकांच्या मनावर ठसली, त्याच्या अभिनयाचं सर्वत्र कौतुक होत आहे. मात्र अभिनयाइतकंच त्याचं वैयक्तिक आयुष्यही तितकंच संघर्षमय राहिलं आहे.
सिद्धार्थ मेननने जन्मावेळी आलेला मृत्यूचा क्षण ‘लोकशाही फ्रेंडली’ला दिलेल्या मुलाखतीत अंगावर काटा आणणारा प्रसंग उघड केला. तो म्हणाला की, जन्माच्या वेळी त्याला गंभीर अडचणींचा सामना करावा लागला होता. गळ्याभोवती नाळ अडकलेली असल्यामुळे त्याच्या मेंदूपर्यंत साधारण दीड ते दोन मिनिटे रक्तपुरवठा झाला नव्हता. ही परिस्थिती नवजात बाळासाठी अत्यंत धोकादायक असते. या गंभीर स्थितीमुळे डॉक्टरांनी त्याला मृत घोषित केल्याचंही सिद्धार्थने सांगितलं. मात्र काही वेळानंतर त्याने पुन्हा श्वास घेतला आणि मृत्यूच्या दारातून परत आला.
या अनुभवाबद्दल बोलताना तो म्हणतो, “मी प्रत्येक वाढदिवसाला स्वतःला आठवण करून देतो की, मी तिथून परत आलो आहे. त्यामुळे आयुष्यात कितीही खालच्या टप्प्यावर गेलो, तरी पुन्हा उभा राहू शकतो.” सिद्धार्थ मराठी चित्रपटसृष्टीत सक्रिय आहे. सुरुवातीला भाषेची अडथळा जाणवत होती. मात्र सहकलाकारांनी आणि दिग्गजांनी त्याला मोलाचं मार्गदर्शन केलं. अतुल कुलकर्णी, गीतांजली कुलकर्णी आणि दिग्दर्शक सतीश राजवाडे यांनी आपल्याला खूप काही शिकवलं. असं सांगत सिद्धार्थने मराठी इंडस्ट्रीतील आपुलकीचा अनुभव शेअर केला. ‘दशावतार’ चित्रपटाची झलक ‘दशावतार’ या चित्रपटात दिलीप प्रभावळकर, प्रियदर्शिनी इंदलकर, अभिनय बेर्डे आणि महेश मांजरेकर यांसारख्या दिग्गज कलाकारांनी प्रमुख भूमिका साकारल्या आहेत.
