कान्स फिल्म फेस्टिव्हलचं ग्लॅमर हे दरवर्षी पाहायला मिळतं. कला आणि फॅशनने सजलेल्या या मंचावर चित्रपटांचा गौरव केला जातो. अशातच यंदाच्या कान्स महोत्सवात भारताच्या शिरपेचात मानाचा तुरा रोवला गेला आहे. तब्बल तीन दशकांनंतर एका भारतीय चित्रपटाला कान्स महोत्सवात नामांकन मिळाले आहे. ‘All We Imagine As Light’ या भारतीय चित्रपटाला कान्समध्ये नामांकन मिळाले आहे. या चित्रपटाला सर्वोत्कृष्ट चित्रपटाच्या श्रेणीत पाल्मे डी’ओर पुरस्कारासाठी नामांकन मिळाले आहे.
या चित्रपटात छाया कदम यांची प्रमुख भूमिका आहे. छाया कदम यांनी आजवर ‘फॅंड्री’, ‘सैराट’, ‘न्युड’, ‘रेडू’, ‘सरला एक कोटी’ अशा गाजलेल्या मराठी चित्रपटांसह ‘झुंड’ व ‘गंगूबाई काठियावाडी’ अशा बॉलीवूड चित्रपटांत अभिनय केला आहे. सध्या त्यांच्या ‘लापता लेडीज’ या चित्रपटातील भूमिकेचं सर्व स्तरातून कौतुक होत आहे. अशातच त्यांनी नुकत्याच शेअर केलेल्या एका व्हिडीओमुळे त्यांचं पुन्हा एकदा कौतुक होत आहे.
छाया कदम यांचा सोशल मीडियावर एक व्हिडीओ व्हायरल होत आहे. या व्हिडीओमध्ये त्यांच्या ‘All We Imagine As Light’ या चित्रपटातील भूमिकेचं कौतुक केलं जात आहे. छाया कदम यांच्या ‘All We Imagine As Light’ या चित्रपटाचा कान्स चित्रपट महोत्सवात प्रीमियर झाला आणि या चित्रपटाचा प्रीमियर संपल्यानंतर उपस्थितांनी त्यांना उभं राहून मानवंदना दिली. टाळ्यांच्या कडकडाटात सर्वांनी अभिनेत्रीचे कौतुक केले. यावेळी उपस्थितांच्या कौतुकाने छाया कदम खूपच भारावलेल्या दिसत आहेत. विशेष म्हणजे तब्बल तीन दशकांनंतर भारतीय चित्रपट कान्समध्ये दाखल झाला आहे.
दरम्यान, ‘All We Imagine As Light’ या भारतीय चित्रपटाला कान्समध्ये नामांकन मिळाले आहे. या चित्रपटाला सर्वोत्कृष्ट चित्रपटाच्या श्रेणीत पाल्मे डी’ओर पुरस्कारासाठी नामांकन मिळाले आहे. ‘All We Imagine As Light’ या चित्रपटाचे दिग्दर्शन पायल कपाडिया यांनी केले आहे. तर या चित्रपटात कनी कुसरुती, छाया कदम, दिव्या प्रभा यांच्या प्रमुख भूमिका आहेत.