ankur wadhave baby boy : अनेक कलाकार मंडळी सोशल मीडियाद्वारे चाहत्यांना आनंदाची, सुख-दुःखाची बातमी देत असतात. आणि चाहतेही या कलाकारांच्या आनंदात सहभागी होतात. बरेचदा ही मंडळी घर घेतल्याची, गाडी घेतल्याची, आई-बाबा झाल्याची आनंदाची बातमी देतात. यांत आता एका मराठमोळ्या अभिनेत्याने बाबा झाल्याची आनंदाची बातमी चाहत्यांसह शेअर केली आहे. अंकुर सोशल मीडियावर बऱ्यापैकी सक्रिय असतो. नेहमीच तो काही ना काही शेअर करत चाहत्यांच्या संपर्कात राहत असतो. हा अभिनेता म्हणजे चला हवा येऊ द्या फेम अंकुर वाढवे. अंकुरने फेसबुक पोस्ट शेअर करत दुसऱ्यांदा बाबा झाल्याची आनंदाची बातमी दिली.
‘चला हवा येऊ द्या’ या शोमुळे अंकुरला खऱ्या अर्थाने लोकप्रियता मिळाली. सिनेसृष्टीत कोणताही वारसा हक्क नसताना त्याने स्वतःच स्थान निर्माण केलं. ‘चला हवा येऊ द्या’ या लोकप्रिय शोबरोबरच तो अनेक चित्रपटांमध्येही झळकला आहे. अंकुर अभिनयाबरोबरच त्याच्या वैयक्तिक आयुष्यामुळेही चर्चेत राहिला आहे. २८ जून २०१९ रोजी अंकुर लग्नबंधनात अडकला. त्यानं २०२१ मध्ये त्यांच्या घरी चिमुकलीचं आगमन झालं. त्यानंतर आता लग्नाच्या सहा वर्षांनी अंकुर दुसऱ्यांदा बाबा झाला.
“दुसऱ्यांदा बाबा झालो यावेळी मुलगा झाला”, असं कॅप्शन देत त्याने ही आनंदाची बातमी दिली आहे. या पोस्टमध्ये त्याच्या मुलाचा हात हातात घेतल्याचा फोटो पाहायला मिळत आहे. अगदी दिवाळीच्या शुभमुहूर्तावर अंकुरने ही आनंदाची बातमी दिली आहे. अंकुरने दिलेल्या या गोड बातमीवर अनेकजण कौतुकाचा आणि शुभेच्छांचा वर्षाव करत आहे.
अंकुर ‘चला हवा येऊ द्या’मुळे घराघरांत पोहोचला. याशिवाय त्याने ‘पुढं त्याने गेलो गाव’, ‘गाढवाचं लग्न’, ‘सर्किट हाऊस’, ‘आम्ही सारे फर्स्ट क्लास’, ‘सायलेन्स’, ‘कन्हैय्या’ यांसारख्या नाटकांमध्ये भूमिका साकारल्या आहेत. तसेच ‘जलसा’ या मराठी चित्रपटातही त्याने काम केलं होतं. याशिवाय अंकुर उत्तम कवी देखील आहे.
