बॉलिवूडमध्ये सध्या अभिनेता रणबीर कपूरच्या ‘ॲनिमल’ चित्रपटाची चांगलीच चर्चा रंगली आहे. ट्रेलर प्रदर्शित झाल्यापासून या चित्रपटाबाबत बरीच उत्सुकता पाहायला मिळत आहे. हा बहुचर्चित चित्रपट १ डिसेंबरला प्रेक्षकांच्या भेटीला येणार आहे. सध्या या चित्रपटातील सगळे कलाकार चित्रपटाच्या प्रमोशनामध्ये व्यस्त असलेले पाहायला मिळत आहेत. विविध शहरांमध्ये जावून हे कलाकार चित्रपटाचं प्रमोशन करत आहेत. यादरम्यान हैदराबादमधील प्रमोशनावेळी रणबीरने त्याच्या वैयक्तिक आयुष्याबरोबर त्याच्या व्यावसायिक आयुष्याचाही खुलासा केला. यासह त्याने हेही स्पष्ट केलं की त्याला त्याचा बराचसा वेळ त्याच्या लेकीसह घालवायचा आहे आणि त्याला अभिनय करण्याची इच्छा नाही. (ranbir Kapoor wants to quit acting)
नुकताच रणबीर त्याच्या ‘ॲनिमल’ चित्रपटाच्या प्रमोशनासाठी चेन्नईत पोहोचला. यावेळी त्याच्याबरोबर अभिनेता बॉबी देओल व अभिनेत्री रश्मिका मंदानाही उपस्थित होती. तेव्हा हैदराबादमधील प्रमोशन कार्यक्रमादरम्यान लेकीबाबत बोलताना त्याने स्पष्ट केलं की, “मला आता केवळ माझ्या लेकीबरोबर वेळ घालवायचा आहे. मला आता अभिनय करायचा नाही. मला काम पूर्णपणे बंद करायचं आहे. पण मी असं करू शकत नाही. कारण मला माझी आवडही जोपासायची आहे. हा माझ्या आयुष्यातील सर्वात मोठा आनंद आहे. देव जेव्हा काही हिरावून घेतो तेव्हा तो तुम्हालाही काहीतरी देतो. राहा आमच्या आयुष्यात आली याबद्दल मी देवाचा खूप आभारी आहे”, असं सांगत त्याने आपल्या लेकीबाबतच प्रेम व्यक्त केलं. त्याचबरोबर त्याने त्याची कामाबाबतची आवडही सांगितली.
रणबीर कपूर व आलिया भट्ट हे जोडपं मागच्या वर्षी ६ नोव्हेंबरला आई-बाबा झाले. नुकताच त्यांनी त्यांच्या लेकीचा पहिला वाढदिवस साजरा केला. लेक वर्षाची झाली असली तरीही मात्र त्यांनी अजूनपर्यंत त्यांच्या लेकीचा चेहरा दाखवलेला नाही. जेव्हा राहाचा जन्म झाला होता त्यावेळी तो ‘ॲनिमल’ चित्रपटाची शुटिंग करत होता.
हा चित्रपट १ डिसेंबरला प्रेक्षकांच्या भेटीला येणार आहे. चित्रपटात रणबीरसह अभिनेता बॉबी देओल, अभिनेत्री रश्मिका मंदाना तसेच अनिल कपूरही दिसणार आहे. हा चित्रपट संदीप रेड्डी वंगा यांनी दिग्दर्शित केला आहे. या चित्रपटाचं ॲडव्हान्स बुकिंग सुरु झालं आहे. माहितीनुसार २ लाखांहून अधिक तिकिटं विकली गेल्याचं समोर आलं आहे.
