bollywood auditions scam : सिनेसृष्टी म्हटलं की ट्रोलिंग हे आलंच. शिवाय अनेक कलाकार मंडळी आहेत ज्यांना सिनेविश्वात कास्टिंग काऊचची शिकारही व्हावं लागलं आहे. अनेक नवोदित कलाकार मंडळी आहेत ज्यांना सिनेसृष्टीत वाईट प्रसंगाचा सामना करावा लागला आहे. बॉलिवूडची झगमगती दुनिया असली तरी यामागची दुनिया नेमकी कशी आहे याचा बऱ्यापैकी अनुभव या कलाकार मंडळींना आला असावा. बरीच अशी कलाकार मंडळी आहेत ज्यांनी आजवर कास्टिंग काऊचचा त्यांचा अनुभव चाहत्यांसह शेअर केला आहे. तर काहींनी हा अनुभव न सांगणं प्रिफर केलं आहे. अशातच बॉलिवूडमधील विनोदी नट जॉनी लिव्हर यांच्या मुलीलाही म्हणजे अभिनेत्री जिमी लिव्हरलाही असाच काहीसा वाईट अनुभव ऑडिशन दरम्यान आला असल्याचं तिने दिलेल्या मुलाखतीत सांगितलं.
जिमीने झूमला दिलेल्या मुलाखतीत हा वाईट अनुभव शेअर केला. आंतरराष्ट्रीय चित्रपटाच्या ऑडिशनच्या नावाखाली तिला कपडे काढण्यास सांगितले. वेळीच सावधनात बाळगत जिमीने स्वतःची सुखरूप सुटका केली. ऑडिशन व्हिडीओ कॉलवर होईल असे दिग्दर्शकाकडून तिला सांगण्यात आले होते. जिमी म्हणाली, “ऑडिशन ऑनलाईन असल्याचं सांगितलं पण संहिता स्क्रिप्ट शेअर केली जाणार नाही असंही सांगितलं. मग मला एक लिंक पाठवण्यात आली आणि मी तो कॉल जॉइन केला. पण, समोरच्या व्यक्तीचा व्हिडीओ सुरु नव्हता. “मी व्हिडीओ ऑन करु शकत नाही. पण तू या भूमिकेसाठी अगदी परफेक्ट आहेस. काही गोष्टी टेस्ट करायच्या आहेत”, असं तो म्हणाला. त्यानंतर जिमी सांगते, “ही भूमिका बोल्ड आहे. त्यामुळे मी विचारलं की, मला नेमकं काय करायचं आहे, तेव्हा त्या व्यक्तीनं सांगितलं, “कल्पना कर की, तुझ्यासमोर ५० वर्षांचा माणूस बसला आहे आणि त्याला तुला आकर्षित करायचं आहे. नंतर त्यानं कपडे उतरवण्याचा सल्ला दिला. आणि शेवटी एक इंटिमेट सीन असल्याचंही सांगितलं”.
जिमीला ही गोष्ट कुठेतरी खटकली. तिने लगेच सावधान होत विचारलं, “मी लगेच स्पष्ट केलं की, मला हे अजिबात कम्फर्टेबल वाटत नाही. मी स्क्रिप्ट असेल, तर त्यानुसार काम करते. त्यावर त्यांनी सांगितलं की, कोणतीही स्क्रिप्ट नाही. त्यामुळे तुला काही बोलायचं असेल किंवा दुसरं काही करायचं असेल, तर ते मोकळ्या मनानं कर”. यासाठी अजिबात तयार नसल्याचं जिमीने म्हटलं. तरीही तो तिला पटवून देत म्हणाला, “हा खूप मोठा प्रोजेक्ट आहे, तुला यामध्ये कास्ट करायचं आहे”. मग मी स्पष्टपणे सांगितलं, “जर हेच अपेक्षित असेल, तर मी बोलायलासुद्धा तयार नाही” आणि मी लगेच व्हिडीओ कॉल बंद केला”.
कॉल बंद करताच जिमीच्या लक्षात आलं की, ही एक मोठी फसवणूक असू शकते. त्याबद्दल ती म्हणाली, “जर मी यादरम्यान काही केलं असतं, तर त्यांनी त्याचा व्हिडीओ बनवून माझा मानसिक छळ केला असता. पण सुदैवानं मी माझं डोकं वापरलं आणि त्यातून वेळीच बाहेर पडले. पण यामुळे मला फार धक्का बसला होता. कारण मला याआधी असा अनुभव कधीच आला नव्हता. जॉनी लिव्हरची मुलगी आहे हे माहीत असूनही त्यांनी फसवायचा प्रयत्न केला”.
