Abhijeet Bhattacharya On Ranbir Kapoor : अयोध्येतील राम मंदिराच्या उद्घाटनावेळी गायक अभिजीत भट्टाचार्य खूप बोलले आणि सेलिब्रिटींबद्दल संतापही व्यक्त केला. रणबीर कपूरला निमंत्रित करण्याबाबतही त्यांनी यावेळी टिप्पणी केली ज्यामुळे मोठा वाद निर्माण झाला असल्याचं पाहायला मिळालं. अमिताभ बच्चन, कतरिना कैफ, विक्की कौशल, आलिया भट्ट आणि आयुष्मान खुराना यांच्यासह अनेक बॉलिवूड कलाकार राम मंदिरच्या अभिषेक सोहळ्यात सहभागी झाले होते. त्यांनतर गायक अभिजीत भट्टाचार्य यांनी या उपस्थितीवर प्रश्न निर्माण करत केलेलं भाष्य साऱ्यांचं लक्ष वेधून घेत आहे. आणि या गायकाने उपस्थित केलेला प्रश्न वादाच्या भोवऱ्यात अडकला असल्याचं पाहायला मिळत आहे.
अभिजीत यांनी नुकत्याच बॉलिवूड ठिकाणाला दिलेल्या मुलाखतीत राम मंदिर उदघाटनावेळील उपस्थितीवरुन नाराजी व्यक्त केली. अभिजीत भट्टाचार्य म्हणाले की, “राम मंदिराचे उद्घाटन झाले तेव्हा गोमांस खाणाऱ्याला बोलावले होते आणि तुम्ही गायीला माता म्हणता”. अभिजीतने रणबीर कपूरवर केलेल्या कमेंटमुळे चाहत्यांमध्ये पुन्हा एकदा चर्चेला उधाण आले आहे. रणबीर कपूरची २०११ मध्ये बीफ खाण्याबाबतची कॉमेंट व्हायरल झाली होती. त्याच्या २०२२ मध्ये आलेल्या ‘ब्रह्मास्त्र’ चित्रपटाच्या प्रमोशनदरम्यानही हे समोर आले होते, ज्यामुळे बजरंग दलाच्या कार्यकर्त्यांनी विरोध केला होता.
कार्यकर्त्यांनी रणबीर आणि त्याची पत्नी आलिया भट्ट यांना उज्जैनच्या महाकालेश्वर मंदिरात प्रवेश करण्यापासून रोखले आणि अभिनेत्याच्या टिप्पणीला आक्षेपार्ह म्हटले. २०१३ मध्ये आलेल्या ‘बेशरम’ चित्रपटातील ‘दिल का जो हाल है’ या गाण्याबद्दल बोलताना अभिजीतने फिल्म इंडस्ट्रीवर टीका केली. आपल्या स्पष्टवक्ते शैलीसाठी प्रसिद्ध असलेला हा गायक म्हणाला, “देवाचे आभार, मी या काळातील गायक नाही. मी एका सुपर फ्लॉप चित्रपटात ‘दिल का जो हाल है’ हे गाणे गायले आहे. गाणे हिट झाले नाही. गाण्याच्या चित्रपटाबद्दल कोणालाच माहिती नाही. गाणे वाजवले तर कळेल हे गाणं कोणी गायलं आहे”.
यापुढे ते असंही म्हणाले की, “सर्वाधिक फ्लॉप गाणे वाजले तरी लोकांना ते गाणे कोणाचे आहे हे कळेल आणि त्याच्याशी संबंधित नायक किंवा चित्रपट नाही. ही मालमत्ता संगीत कंपनीची आहे. त्यांच्याकडे अधिकार आहेत आणि आम्हाला रॉयल्टी मिळत नाही. मात्र, प्रत्येकाला कान आहेत आणि कानापर्यंत आणि हृदयापर्यंत पोहोचणारा आवाज माझा आहे”. अभिनव कश्यप दिग्दर्शित ‘बेशरम’मध्ये रणबीर कपूरसह पल्लवी शारदा, ऋषी कपूर आणि नीतू कपूर होते. या चित्रपटावर टीका झाली आणि बॉक्स ऑफिसवर तो अपयशी ठरला.
