अभिनेत्री सुचित्रा कृष्णमूर्ती सध्या युरोपमध्ये सुट्टी एन्जॉय करत आहे. यावेळी तिने जर्मनीतील बर्लिन येथे ‘नेकेड पार्टी’ला हजेरी लावली. अभिनेत्रीने या पार्टीबद्दलचा तिला आलेला वाईट अनुभव शेअर केला आहे. ‘बॉलीवूड हंगामा’शी बोलताना तिने या पार्टीदरम्यानचा अनुभव शेअर केला आहे. यावेळी बोलताना ती म्हणाली की, “हा खूप वाईट अनुभव होता. मला बिलकुल मजा आली नाही”. ती म्हणाली, “या सगळ्या गोष्टी तिथे अगदी सामान्य आहेत. शरीराच्या सकारात्मकतेला प्रोत्साहन देणे हा त्या पार्टीचा मुद्दा आहे. या पार्टीला हजेरी लावत मला असे वाटले की हा एक अनुभव आहे त्याचा आस्वाद आपण घ्यायला हवा”. (Suchitra Krishnamoorthi News)
पुढे ती म्हणाली, “ही पार्टी एका बारमध्ये होत होती. जी एका मित्राच्या मित्राची होती. मी पाहुण्यांच्या यादीत होते. मी तिथे गेले आणि लगेच पळून आले कारण मी खूप संस्कारी आहे. मला कोणाचेही प्रायव्हेट पार्ट पाहण्यात रस नाही”. ती पुढे असेही म्हणाली की, “पण ही पार्टी तिथे चांगल्या हेतूने आयोजित केली आहे. हे सारं तिथे मजा व सकारात्मकतेसाठी केले जाते. ही पार्टी अजिबात अश्लील नव्हती. पण भारतीय असल्याने आपण आपल्या शरीराबाबत अधिक जागरुकता पसरवली आहे”.
Just attended a body positivity/ naked party in Berlin.
— Suchitra Krishnamoorthi (@suchitrak) July 13, 2024
Reminded me of the quote : dont be so open minded that ur brains fall out.
Desi girl forever. Need a sĥower & some gayatri mantra chanting . Baapre ????
अभिनेत्रीने त्या पार्टीत फक्त २० मिनिटे घालवली, तर ही पार्टी रात्रभर चालली. याचबरोबर तिने X वर याबद्दलही सांगितले. यांत तिने लिहिले की, “अलीकडे बर्लिनमध्ये शरीर सकारात्मकता/नग्न पार्टीत सहभागी झाले होते. मला एक गोष्ट आठवली की, इतके मोकळे होऊ नका की तुमचा मेंदू बाहेर पडेल. मी नेहमीच संस्कारी मुलगी राहिली आहे. स्नान करून गायत्री मंत्राचा जप करण्याची आवश्यकता आहे”.
याबाबत अभिनेत्रीने आपल्या मुलीलाही सांगितले नाही. अभिनेत्रीने सांगितले की तिची मुलगी कावेरीला माहित नाही की तिची आई अशा पार्टीला गेली आहे, परंतु तिला खात्री आहे की, जेव्हा ही गोष्ट तिच्या मुलीला कळेल तेव्हा ती जास्त विचार करणार नाही. सुचित्रा कृष्णमूर्ती म्हणाली, “जरी मी २० मिनिटांत पळून आले असले तरी मी त्या पार्टीला जाण्याचा प्रयत्न केला. मी असे काहीतरी केले याचा तिला आनंद होईल”.
