बॉलिवूडचा एक काळ ज्या अभिनेत्याने गाजवला तो म्हणजे सनी देओल. त्याचे जुने चित्रपट आजही प्रेक्षक आवडीने पाहतात. सनीने आजवर बॉलिवूडला अनेक सुपरहिट चित्रपट दिले. त्याच्या प्रत्येक भूमिका प्रेक्षकांच्या पसंतीस उतरल्या. एखादा चित्रपट हाती घेतला की, त्यासाठी अगदी जीव ओतून काम करायचं हा सनीचा नियमच आहे. प्रत्येक भूमिकेसाठी तो घेत असलेली मेहनत पडद्यावर दिसून येते. आताही तो त्याच्या नव्या चित्रपटाच्या जोरदार तयारीला लागला आहे. ‘बॉर्डर २’ चित्रपटाचं चित्रीकरण आता त्याने पूर्ण केलं आहे. सनी त्याच्या आगामी चित्रपटाच्या तयारीला लागला आहे. यासाठी त्याने त्याचा संपूर्ण लूकच बदलला आहे. (sunny deol new look)
सनीने सोशल मीडियाद्वारे काही नवे फोटो शेअर केले आहेत. या फोटोंमध्ये त्याला थोडं ओळखणंही कठीण झालं आहे. दाढी व मिशी त्याने पूर्णपणे काढून टाकली आहे. त्याचबरोबरीने त्याचं वजनही कमी झालेलं दिसत आहे. सनीने इन्स्टाग्रामद्वारे फोटो शेअर करत म्हटलं की, “नवा लूक, नवी दिशा”. डोळ्याला गॉगल लावून त्याने हटके पोझ दिल्या आहेत. सनीचा नवा लूक पाहून चाहतेही हैराण झाले आहेत.
सनी त्याच्या आगामी चित्रपटात हनुमानाच्या भूमिकेत दिसणार आहे. त्यासाठी त्याने लूकमध्ये बदल केला आहे. सनी घेत असलेल्या मेहनतीचं चाहते कौतुक करत आहेत. हनुमान यांच्या भूमिकेसाठी तू लूक बदलला आहेस, जय श्रीराम, जंगलात फक्त एकच वाघ आहे आणि तो म्हणजे सनी देओल, जबरदस्त लूक त्याचबरोबर कारही एकदम मस्त, हनुमानाच्या भूमिकेची तयारी सुरु आहे का?, तुला पुढील चित्रपटात पाहण्यासाठी उत्सुक आहोत अशा विविध कमेंट नेटकऱ्यांनी केल्या आहेत.
‘रामायणम्’ चित्रपटाचा टीझर शेअर करत सनीने या चित्रपटाचा मीही महत्त्वाचा भाग असल्याचं म्हटलं होतं. सनीने एका मुलाखतीत हनुमानाची भूमिका साकरण्यावरुन म्हटलं होतं की, “मला या भूमिकेसाठी काम करताना भीती वाटत आहे. माझ्यासाठी हे खूप कठीण आहे”. हा चित्रपट दोन भागांमध्ये प्रदर्शित होणार आहे. ‘रामायणम्’चा पहिला भाग २०२६मध्ये तर दुसरा भाग २०२७मध्ये प्रदर्शित होणार आहे.
