‘तेरी बातो मे ऐसा उलझा जिया’ या चित्रपटामधून अभिनेते राकेश बेदी खूप चर्चेत आले होते. आतापर्यंत त्यांच्या अभिनयाने त्यांनी प्रेक्षकांच्या मनात एक वेगळे स्थान निर्माण केले आहे. ‘गदर’, ‘उरी’, ‘बिंदु की जवानी’ या चित्रपटांमधूनही ते प्रेक्षकांच्या भेटीला आले होते. पण आता ते अभिनयामुळे नाही तर एका वेगळ्याच कारणामुळे चर्चेत आले आहेत. राकेश यांची पत्नी आराधना बेदी या सायबर फ्रॉडच्या शिकार झाल्या आहेत. याबद्दलची माहिती त्यांनी माध्यमांना दिली आहे. (rakesh bedi wife cyber fraud)
मिळालेल्या माहितीनुसार राकेश यांची पत्नी आराधना ही सायबर फ्रॉडच्या जाळ्यात अडकल्या आहेत. त्यांची तब्बल ४.९८ लाख रुपयांचा गंडा घातला आहे. याबद्दल त्यांनी ‘इटाइम्स’बरोबर बोलताना सांगितले की, “एका नंबरवरुन कॉल आला होता. त्यामध्ये समोरची व्यक्ती म्हणाली की त्यांच्या खात्यांमध्ये चुकून पैसे जमा झाले आहेत आणि ते मिळवण्यासाठी ओटीपीची गरज पडेल. त्यानंतर खात्यातून मोठी रक्कम काढली गेली”. त्यानंतर त्यांनी ओशिवरा पोलिस स्थानकात तक्रार दाखल केली असून पोलिस तपास करत आहेत.
याबद्दल राकेश यांनी आराधना यांना आलेल्या फोन कॉलवरुन समजले होते की हा फोन फसवणूक करणारा आहे. त्यामुळे त्यांनी लगेचच फोन कट केला होता. पण त्यांनी नंतर जेव्हा अकाऊंट चेक केले तेव्हा आकाऊंटमध्ये पैसे नव्हते.
याबाबत ओशिवरा पोलिस स्थानकातील मोहन पाटील यांनी सांगितले की, “राकेश बेदी यांनी पैसे गेल्याची तक्रार दाखल केली आहे”. तसेच ते पुढे म्हणाले की, “आम्ही आता या सर्व प्रकरणाचा तपास सुरु केला आहे. पण हे प्रकरण थोडं गुंतागुंतीचं आहे. कोणत्याही माहितीशिवाय अकाऊंटमधून पैसे गेले आहेत. त्यामुळे आता आम्ही आरोपींना पकडण्यासाठी प्रयत्न करणार आहोत”.
याआधी राकेश यांचीदेखील अशीच फसवणूक झाली होती. त्यांच्या खात्यातून ७५ हजार रुपये काढले गेले होते. याची तक्रारदेखील त्यांनी ओशिवरा पोलिस स्थानकात नोंदवले होती.