suraj chavan wedding : ‘बिग बॉस मराठी’ सिझन ५ चा विजेता सूरज चव्हाणला ‘बिग बॉस’ मुळे खऱ्या अर्थाने लोकप्रियता मिळाली. ‘बिग बॉस’ नंतर सूरज सोशल मीडिया इन्फ्लुएन्सर म्हणून खऱ्या अर्थाने लोकप्रियतेस आला. सोशल मीडियावर सूरज बऱ्यापैकी सक्रिय असलेला पाहायला मिळाला आहे. काही दिवसांपूर्वी सूरजने दाक्षिणात्य लूक केलेल्या मुलीसह एक सुंदर असा फोटो शेअर केला होता, त्यानंतर त्याच्या लग्नाच्या चर्चांनी जोर धरलेला पाहायला मिळाला. यावर अनेकांनी हे लग्न नसून हा त्याच्या नव्या प्रोजेक्टचा भाग असल्याचं म्हटलं आहे. तर सूरजच्या नातेवाईकांनी लग्न ठरल्याची बाब खरी असल्याचं म्हटलं. त्यामुळे अनेकजण संभ्रमात पडले. यानंतर आता थेट सूरजची मानलेली बहीण अंकिता वालावलकरने याबाबत भाष्य केलं आहे.
सूरज चव्हाणच लग्न ठरलं आहे यावर कोकणहार्टेड गर्लने व्हिडीओ शेअर करत शिक्कामोर्तब केला आहे. अंकिता वालावलकरने नुकतीच सूरज चव्हाणची भेट घेतली. त्याला भेटायला तिने बारामती गाठलं. ‘बिग बॉस’च्या घरात सूरज आणि अंकिताच उत्तम बॉण्ड झाला होता. आणि तोच बॉण्ड त्यांनी घराबाहेर आल्यानंतरही कायम राखला. दोघंही एकमेकांना भाऊ-बहीण म्हणत एकमेकांचा आदर करतात. अंकिताने सूरजच्या नव्या घराचीही पाहणी केली.
नवं घर बांधण्याचं स्वप्न सूरजच पूर्ण झालं आहे. पण अजून आतील काही काम शिल्लक आहे. व्हिडीओमध्ये अंकिताने सूरजच्या नव्या घराची झलकही दाखविली आहे. याचबरोबर लक्षवेधी बाब म्हणजे अंकिताला सूरजने एका खास व्यक्तीची भेट घडवून दिली. सूरजच्या होणाऱ्या पत्नीची भेट तिने घेतली, आणि तिच्याबरोबरचा फेस हाईड करत एक फोटोही या व्हिडीओमध्ये शेअर केला.
अंकिताने सूरजच्या होणाऱ्या पत्नीसह फोटो शेअर करत या फोटोच्या कॅप्शनमध्ये, “सूरजला खूप खूप शुभेच्छा… लग्नाला येणं शक्य होईल असं वाटत नसल्यामुळे ही सदिच्छा भेट” असं लिहिलं आहे. अंकितानेच सूरजच लग्न ठरलं असल्याची बातमी दिली असल्याने आता चाहतेही यावर विश्वास ठेवत आहेत. सूरज आता ही लग्नाची गोड बातमी कधी देणार याकडे साऱ्यांच्या नजरा लागून राहिल्या आहेत.
