Jay Dudhan arrested : मराठी कलाविश्वात काही दिवसांपूर्वीच एक खळबळजनक बातमी कानावर आली. अभिनेत्री हेमलता बाणे हिला खंडणी प्रकरणात अटक झाल्याच यावेळी समोर आलं. या पाठोपाठ आता आणखी एका अभिनेत्याला अटक झाली असल्याचं समोर आलं आहे. हा अभिनेता दुसरा तिसरा कोणी नसून ‘बिग बॉस मराठी’चा उपविजेता जय दुधाणे आहे. काही दिवसांपासून जय सोशल मीडियावर चर्चेत असलेला पाहायला मिळाला. ११ दिवसांपूर्वी जय दुधाणेचा थाटामाटात लग्न सोहळा पार पडला. लग्नाच्या ११ दिवसांनी हनिमूनला जातानाच विमानतळावरुन जयला अटक केली असल्याच समोर आलं आहे. पाच कोटी रुपयांची फसवणूक केल्या प्रकरणात ही अटक झाली असल्याचे समोर आलं आहे.
‘एबीपी माझा’ वृत्तवाहिनीने दिलेल्या माहितीनुसार जय दुधाणे म्हणाला, “वडिलांची जबाबदारी घेतली, पण लोक माझ्यावरच उलटले आहेत. सत्य लवकरच समोर येईल. मी कुठे पळून गेलो नाही. जे आहे त्याला सामोरं जाणार. पोलिसांनी सर्वांवर गुन्हे दाखल केले आहेत. माझ्या आजी-आजोबांनाही सोडलं नाही. गाळा विकल्यावरून ही अफवा कोण पसरवत आहे, तेच समजत नाही. तसं काही असेल तर तुम्ही सिद्ध करुन दाखवा. हा खोटा गुन्हा आहे आणि मी माझा चेहरादेखील लपवला नाही. सत्य लवकरच समोर येईल. माझ्या न्यायव्यवस्थेवर पूर्ण विश्वास आहे. आयुष्यात अशा अनेक अडचणी आपल्यासमोर येतात, त्यांना सामोरं जाण्याची हिंमतदेखील असली पाहिजे आणि ती माझ्यात आहे”.
आणखी वाचा – साऊथ अभिनेत्याची मद्यधुंद अवस्थेत चारचाकीला धडक; अपघातादरम्यान ५३ वर्षीय व्यक्तीचा मृत्यू, नेमकं प्रकरण काय?
याविषयी तो पुढे म्हणाला, “मी माझ्या हनिमूनसाठी जात होतो. मी, माझी बायको, माझा भाऊ आणि त्याची बायको असे चौघेजण परदेशात जात होतो. माझ्या नावाचं अटक पत्र आहे हे मलाच माहिती नव्हतं. पोलिसांनी मला सांगितलं की तुम्ही देश सोडून जाऊ शकत नाही. त्यामुळे मी पोलिसांना सामोरं जाणार आहे”.
नेमकं प्रकरण काय?
जय दुधाणेच्या कुटुंबियांचे काही गाळे पोखरणरोड क्रमांक एक भागात आहेत. हे गाळे एका खासगी बँकेकडे तारण आहेत. असे असतानाही त्यांनी हे गाळे त्याच भागात राहणाऱ्या एका व्यक्तीला विक्री करण्याचा प्रयत्न केला. तसेच त्या गाळ्यांच्या मोबदल्यात जय दुधाणे आणि त्यांच्या कुटुंबियांनी तक्रारदार यांच्याकडून टप्प्याटप्प्याने ४ कोटी ६१ लाख रुपये घेतले होते. आपली फसवणूक झाल्याचे लक्षात आल्यानंतर तक्रारदार यांनी याप्रकरणी वर्तकनगर पोलीस ठाण्यात तक्रार दिली. त्यानुसार गुन्हा दाखल झाल्यानंतर वर्तकनगर पोलिसांनी जय दुधाने याला विमानतळावरुन अटक केली.
