Bigg Boss Marathi 5 : ‘बिग बॉस मराठी’चं पाचवं पर्व सध्या दणक्यात सुरू आहे. या कार्यक्रमाच्या टीआरपीमध्ये दिवसेंदिवस वाढ होत आहे. शनिवारी या शोचा खास भाऊचा धक्का पार पडला. या भाऊच्या धक्क्यावर रितेशने सर्वांची कानउघडणी करत सर्वांचाच समाचार घेतला. या घरात काही दिवस खेळाव्यतिरक्त स्पर्धकांनी वैयक्तिक आयुष्याबद्दल वक्तव्य केली होती. गेल्या आठवड्यात बाहुल्यांचा टास्क संपल्यावर निक्कीने वर्षा यांच्या मातृत्त्वावर भाष्य केलं होतं. निक्कीच्या या वक्तव्यामुळे सर्वत्र नाराजी पसरली होती. वर्षा यांच्या चाहत्यांसह अनेक मराठी कलाकारांनी निक्कीच्या वक्तव्यावर संताप व्यक्त केला होता. त्यामुळे भाऊच्या धक्क्यावर रितेशनेदेखील निक्कीला याबद्दल जाब विचारत तिला खडेबोल सुनावले. (Bigg Boss Marathi 5 daily update)
यावेळी रितेशने निक्कीला असं म्हटलं की, “तुम्ही या आठवड्यात वर्षा यांच्याबद्दल जे वक्तव्य केलंत. त्यासाठी कुठेही माफी नाही. तुम्ही त्यांना म्हणालात, ‘वर्षाजी तुम्हाला आईच्या भावना कशा कळणार?’ तुम्ही कोणाच्या तरी मातृत्त्वावर भाष्य केलं आहे आणि तुम्हीही एक स्त्री आहात. निक्की या भावना खरंतर तुम्हाला कळल्या पाहिजेत. आमच्या मराठी ‘बिग बॉस’मध्ये माफी मागायचं नाटक करायचं असेल, तर खुशाल करा. अख्खा महाराष्ट्र बघत आहे. पहिल्या आठवड्यात तुम्ही सॉरी म्हणालात, दुसऱ्या आठवड्यात सॉरी म्हणालात आणि आताही तेच केलंत. तुम्ही एका शोमध्ये आहात आणि इथे शंभर कॅमेरे आहेत, तुमचा प्रत्येक शब्द कॅप्चर केला जातो. तुम्ही जे बोलता ते आज घराघरांत लोक पाहत आहे त्यामुळे जबाबदारीने बोलणं तुम्हाला भाग आहे. तुम्हाला काय वाटतं? तुमच्या या एका वाक्याने फक्त या एका व्यक्तीचं मन दुखवलं गेलं आहे”.
यापुढे त्याने असं म्हटलं की, “तुमचा एक स्वतंत्र बिग बॉस सुरू आहे तो म्हणजे ‘निक्कीचा बिग बॉस’. तुमच्या ‘बिग बॉस’मध्ये तुम्ही कोणत्याही थराला जाता, समोरच्या माणसाचा वाटेल तसा अपमान करता आणि हे सगळं करून नंतर सॉरी बोलता. पण, आमच्या ‘बिग बॉस मराठी’मध्ये सॉरी बोलावं लागेल असं कोणी वागायचंच नसतं. हे असं वागणं तुम्हाला काही जमणार नाही. “दररोज चुका करून इतक्या वेळा सॉरी बोलू नका की, एक दिवस प्रेक्षक तुम्हालाच सॉरी म्हणतील आणि ‘बिग बॉस मराठी’मधून तुम्हाला बाहेर करतील”.
यापुढे रितेशने वर्षा उसगांवकरांना उद्देशून म्हटलं की, “वर्षाजी तुम्ही हा विषय वाढवू शकला असता, याच्यावर वाद घालू शकला असता. पण, असं न करता हा विषय तुम्ही अतिशय संयमाने हाताळला. एकही शब्द बोलला नाहीत आणि माफी मागितल्यावर तुम्ही पटकन माफही केलंत. यासाठी खरंच तुमचं खूप कौतुक आहे”. दरम्यान, यापुढे रितेशने “वैयक्तिक आयुष्यावर टिप्पणी न करता हा गेम खेळा, इथे काय सुरु आहे? याबद्दल संवाद साधा. कोणाच्याही कुटुंबियांबद्दल किंवा वैयक्तिक आयुष्याबद्दल भाष्य करू नका” अशी ताकीद दिली.
