भारतातील नंबर वन रियालिटी शो म्हणून ‘बिग बॉस’ हा कार्यक्रम ओळखला जातो. ‘बिग बॉस’ मराठी असो किंवा हिंदी कायमच प्रेक्षकांच्या मनोरंजन यादीत हा कार्यक्रम अव्वल स्थानावर राहिला आहे. या कार्यक्रमाची क्रेझ सर्वत्र असलेली कायमच पाहायला मिळते. अशातच हिंदी बिग बॉसचं नवं पर्व प्रेक्षकांच्या भेटीला येणार असल्याची आनंदाची बातमी समोर आली आहे. कित्येक दिवसांपासून प्रेक्षक ‘बिग बॉस’च्या नव्या पर्वाची आतुरतेने वाट पाहत होते. अशातच हिंदी ‘बिग बॉस’चे १७ वे पर्व प्रेक्षकांच्या भेटीस येण्यास सज्ज झाले आहे. (Bigg Boss 17 New Season)
यंदाचा ‘बिग बॉस १७’ हा सिझन धमाकेदार असल्याचं समोर आलं आहे. जुने विक्रम मोडत यंदाच्या नव्या पर्वत नव्या गोष्टी घडणार आहेत, ज्या गोष्टी आजवर झालेल्या नाहीत. चाहते या पर्वाची आतुरतेने वाट पाहत असतानाच या नव्या पर्वातील स्पर्धकांची नावे समोर आली. तर काही स्पर्धकांचे प्रोमो समोर आले. दरम्यान अंकिता लोखंडे, विकी जैन, मनारा चोप्रा व अभिषेक कुमार यांचे व्हिडीओ समोर आले आहेत. यंदाच्या पर्वात बिग बॉसच्या घरात कपल विरुद्ध सिंगल अशी तगडी स्पर्धा रंगणार असल्याची माहिती समोर आली आहे.
यंदाच्या ‘बिग बॉस’च्या घरात अंकिता लोखंडे आणि विकी जैन यांच्यासह आणखी काही जोड्या स्पर्धक म्हणून पाहायला मिळणार आहेत. अद्याप या जोड्यांची नावे समोर आलेली नाहीत. सूत्रांनी दिलेल्या माहितीनुसार, या जोडप्यांसाठी बिग बॉसच्या घरात वैयक्तिक खोली देखील दिली जाणार आहे. या ठिकाणी ते एकत्र बसून आपापसात योजना देखील बनवू शकतात. तसेच त्यांना वाटेल तेव्हा ते बिग बॉसशी थेट संवादही साधू शकणार आहेत, असे मीडिया रिपोर्ट्समध्ये बोललं जात आहे.
यंदाच्या पर्वात स्पर्धकांसाठी आर्काइव्ह रूम असणार आहे. जिथे स्पर्धकांना या सीझनचे फुटेज प्रत्यक्ष पाहता येणार आहेत. या फुटेजमधून कुणी काय बोलले, कोणतीही विशेष घटना घडली किंवा एखादं भांडण झालं त्यावेळी नेमकं काय झालं हे सारं त्या फुटेजमध्ये स्पर्धकांना पाहता येणार आहे. हे फुटेज पाहण्याचा अधिकार केवळ निवडक स्पर्धकांना लागू करण्यात येणार आहे.
